«Gizatasun gehiago behar dugu eta burutazio gutxiago. Edukazio gehiago eta higienismo autoritario gutxiago», hala dio Hamaikabat alderdiak Animaliei buruzko ordenantza berriaren inguruan. Ordenantza berri honi hasierako onarpena eman zion Plenoak otsailaren 2an. Bertan biltzen da, besteak beste, txakurrei dagokienean, Udal erregistroan txakurraren DNA (ADN) analisia ere jasoko dutela, orain arteko datuez gain. Eta Udaltzainek espazio publikoan bildu gabeko kaken lagin bat jaso beharko dute eta identifikatzeko azterketa egin eta gero, dagokion txakurraren jabeari prozedura irekiko zaio. Udalaren helburua da jabeek beren txakurren kakak jasotzea.
«ANVren Gobernuak kontuan izan ez duena da, Hernanin erregistratuta ez dauden txakurrek kaka egin ahal izango dutela euren jabeek inongo zigorrik jaso gabe. Horrez gain, ez dira ohartu Udaltzainek beren lanorduen zati haundi bat kalean topatzen dituzten txakur kaken laginak hartzen pasako dutela. Horrek seguruenik eragingo du polizian sail bat sortzea horretarako bakarrik.
Eta gainera, aintzakotzat ez dute hartu erregistratu gabeko txakurren DNA frogen kostua, hernanir guztion diruarekin ordainduko dela (bakoitzak 400 euro inguruko kostua du)», azpimarratu du Hamaikabatek.
«Oraindik aukera dago astakeria hau zuzentzeko»
Ordenantza berriari hasierako onarpena eman zaio eta hilabete osoan zuzenketak aurkezteko aukera dago. Hori horrela, alde ona eta txarra daudela dio Hamaikabatek: «Alde txarra da, alderdi guztiek babestu dutela Hamaikabatek izan ezik. Alde ona: oraindik ez dela behin betiko onartu. Beraz, oraindik aukera dago astakeria hau zuzentzeko. Eta espero dezagun tramitazioak iraun bitartean zentzutasuna nagusitzea».