Hernaniko Amnistiaren Aldeko Mugimenduak Euskal Preso Politikoen Kolektiboaren agiriaren berri eman du prentsa ohar bidez. Agirian, presoen kolektiboak dio, orain dela 30 urtetik egin bezalaxe, «gure herriaren aitortza lortu eta euskal herritarrok gure etorkizunaz erabakitzeko eskubidea errespetatu dadin borrokatzen» jarraituko duela. «Euskal Herria izango da! Hori da gure borroka». Eta azpimarratu du, une honetan ere, EPPK eragile politiko aktibo gisa ariko dela. «Gure kolektiboaren existentzia osoan bezalaxe, gauden, gauzatzen ziegetatik, Euskal Herriaren askapen prozesuari gure ekarpen xumea egiteko borondate sendoa daukagu. Euskal Herriarentzat marko demokratiko bat eraikitzea helburu duen prozesu demokratikoan gure ekarpenak egin eta parte aktibo izateko eskubide osoa dugu eta horretarako prestutasuna eta grina ere baditugu».
Gernikako akordioaren ordezkaritza, EPPKrekin harremanetan jartzea eskatu
EPPK eragile aktibo izateko bide horretan, Gernikako akordioak duen garrantzia azpimarratzen du kolektiboak bere agirian: «Euskal Herriaren etorkizuna modu demokratikoan eraikitzea ahalbidetuko duten zutabeen artean, Amnistia kokatzen du akordioak. Horrez gain, amnistiaren bidean euskal preso politikoen eskubideen aitortza eta errespetua eskatzen du. EPPKrekin erabateko lotura duten gaiak dira aipatutakoak, baita zuzen zuzenean eragiten diotenak ere». Gaineratu duenez, prozesu demokratikoa ezaugarritu eta abian jartzeko ahalegin horretan, harremanak normalizatu eta prozesuan EPPKren parte hartzea bermatzeko ahalegina eskatu diete akordioko eragileei. «Gernikako akordioaren ordezkaritza ofizial bat, EPPKk izendatu duen mintzakidetzarekin harremanetan jartzea da eskatu dieguna».