Txileko irrati komunitarioen egoera aztertuko dute gaur Hernanin, 19:30etan Biterin. AMARCeko (Munduko Irrati Komunitarioen Elkartea) presidenteak Maria Pia Mattak, eta AMARCeko Europako presidenteak Mariano Sanchezek emango dute hitzaldia: Adierazpen askatasuna larrialdi eta berreraikuntza prozesuetan. AMARCek landutako printzipioetan oinarrituta egingo dute azterketa, hau da, irratietan eta ikusentzunezko komunikabideetan dibertsitatea bermatzeko landu duten printzipioetan oinarrituta.
Hitzaldian, batez ere, irrati komunitarioei zigorrak ezartzea ahalbidetzen duten legediei buruz ariko dira, Txilen gertatzen den bezala. Horrez gain, estrategien berri emango dute. Azalduko dute nola lortu zuen Txilek hondamendi egoerari aurre egitea irrati mugimenduaren bidez. Hitzaldia, Molotoff irratiak eta Pausumedia GKEk antolatu dute Udalaren laguntzarekin.