Plenoa izango da gaur eta besteak beste, onartuko da animaliak edukitzea eta babestea arautzen duen udal ordenantzaren moldaketa. Udalak jakinarazi duenez, «aldaketaren helburua argia da: batetik saihestu nahi da, txakur jabeek txakurra kalean uztea edo abandonatzea, eta bestetik, txakur-kakak espazio publikoetatik ez jasotzea». Horretarako, txakurren udal erregistroan, orain arteko datuez gain, txakurren DNA (ADN) analisia ere jasoko dutela jakinarazi dute. Plenoak aldaketa hauek onartu ostean, hilabeteko epea izango dute herritarrek zuzenketak aurkezteko, eta zuzenketak aurkeztu ondoren, Plenoak behin betiko onarpena eman beharko dio araudiari.
Jabearen aurkako
prozedura ireki
DNA froga egitea animalia jabearen ardura izango da. Identifikazio genetiko horren bidez Udalak bazterrean utzitako animalia identifikatzea, Txipa kendu dioten txakurra zein den zehaztea eta kalean edo espazio publikoetan jaso gabe utzitako txakur-kakak zein txakurrenak diren jakitea lortu dezake.
Jabeak kaka jasotzen ez badu, Udaltzainek lagin bat hartuko dute EHUko DNA bankuak ezarritako protokoloaren arabera. Ondoren, banku horretara bidaliko dute, txakurra identifikatu ahal izateko, eta azkenik, jabearen aurkako prozedura irekiko dute. Txakurra identifikatzeko egindako gastu guztiak jabeak ordaindu beharko ditu.
Araudiaren arabera, hutsegite arinak izango dira aurrerantzean animaliak eragin ditzakeen kalteen aurrean erantzukizun zibileko asegurua ez izatea eta DNA analisia egin gabe izatea, eta dagozkion isunak ezarriko zaizkie jabeei.
Horrez gain, araudiak aurrerantzean hutsegite larri gisa hartuko du animaliei tratu iraingarria ematea, eta horren araberako zigorra izango du tratu txarren eragileak.
Hondakinak Hernanik
bidaltzea erabakigai
San Markok eta Hernanik akordio berria sinatu zuten joan den astean eta akordioaren arabera, Hernanik bilduko ditu hondakinak epaileak sententzia definitiboa eman arte. Akordio hori onartu edo ez ere erabakiko da gaur Plenoan. Horrez gain, Santa Barbarako tiro-eremuari buruz ariko dira, 19:00etan Pleno Aretoan (2. pisua).