Beste urtebetez, Kaldereroen konpartsa aterako da Hernanin, Elur Txori elkartearen eskutik. Konpartsaren irteera larunbatean izango da, gaueko 21:00etan eta bertan parte hartzeko entsaioak gaur hasiko dira. Guztira hiru entsaio egingo dira: gaur eta bihar, 20:00etan Elur Txori elkartean; eta ostegunean, 20:30etan Milagrosan. Azken hori entsaio orokorra izango da eta Musika Bandarekin egingo da.
Mende erdi honetan parte hartu dutenei deia
Kaldereroak 50 urte beteko dituzte aurten Hernanin eta Elur Txoriko kideek animatzeko deia luzatu diete mende erdi honetan parte hartu duten guztiei.
Horrez gain, urteurrena dela eta, hainbat ekintza antolatu ditu Elur Txorik. Alde batetik, argazki erakusketa dago Biterin. Otsailaren 5era arte egongo da ikusgai, 17:00etatik 20:00etara. Eta bestetik, liburua eta DVDa daude erosgai. Oindi tabernan eta Peña okindegian daude salgai eta Miguel Lujanbiori erosteko aukera ere bada.