San Markok eta Hernanik akordio berria sinatu zuten joan den astean, Hernanin hondakinak biltzen zeinek segiko duen erabakitzeko, epaileak epe baterako suspenditu baitzuen aurreko akordioa. Zerbitzuen Batzordeak joan den astean onartu zuen akordioa, Gobernu Taldea eta Ezker Batuaren aldeko botuarekin eta oposizioko gainerako alderdien kontrakoarekin. Orain, Plenoak erabakiko du, akordio berri hori onartu hala ez.
Hernanik segiko du biltzen,
«efikaziagatik»
San Markosek asumitu ditu konpetentziak, ontzi arinak eta papera biltzeko, juezaren sententziak hala eskatzen ziolako. Hala ere, Hernanik bilduko ditu hondakin horiek, «efikaziagatik». San Markok ordaindu egingo dio Hernaniri, zerbitzu hori egiteagatik, eta diru sarrerak ere San Markorentzat izango dira.
Akordio berri honek ez du esaten, konpetentziak zeinenak diren eta zeinak ez diren. Hernanik bilduko ditu hondakinak, eta hilero San Markori pasako dio ordainagiria. San Markok hilero ordainduko dio Hernaniri lan hori egiteagatik.
Paperak eta ontzi arinek diru sarrerak ere izaten dituzte, eta diru hori San Markorentzat izango da.
Hiruhilean behin, errebisatu egingo dira Udalaren eta San Markoren kontuak, bietako inor galtzen atera ez dadin, aldaketa honekin.
Marian Beitialarrangoitia Alkateak eta Juan Carlos Merino San Markoko Lehendakariak sinatu zuten akordioa, eta otsailaren 1ean jarriko dute martxan, epaileak behin betiko esaten duen arte, zeini dagozkion konpetentzia horiek.
«Erabaki dugunak logika guztia dauka»
Marian Beitialarrangoitiak Kronikari jakinarazi dionez, erabaki honek logika guztia dauka. «Hondakinak biltzen San Marko hasi zitekeen, baina Atez Ate bildu beharko zituen, Hernaniko Ordenantzak hala esaten duelako. Hor dago koxka. Hondakinak zeinek bildu behar dituen eztabaidatu dezakegu, baina nola bildu behar diren ez, hori, herriak berak erabakitzen duelako. Eta Hernanik erabakita dauka Atez Ate biltzea. San Markok zer hasi behar zuen? Hondakinak Atez Ate biltzen? Ez dago prestatua horretarako».
Hamaikabat: «Merinok huts egin digu»
Hamaikabat alderdiak Kronikari jakinarazi dionez, akordio honek burla egiten dio juezak esandakoari, eta hernaniarrei. «Juan Carlos Merino Errenteriako Alkateari botua eman genion San Markoko lehendakari izateko, eta huts egin digu; ez guri bakarrik, baita berari botua emandako guztiei ere. San Markoko zuzendaritzarekin ez goaz inora Atez Atekoa aldatu nahi dugunok».
«Gogorarazi nahi genuke juezak suspenditu egin zuela aurreko akordioa, eta beraz, behartuta geundela Hernanin kontenedore urdinak eta horiak jartzera».
Iñaki Arratibel H1! alderdiko bozeramaileak dioenez, «Merino-ANV akordioak burla egiten dio juezaren erabakiari, eta hernaniarren gainera botatzen du horrek ekarriko duen gizarte-kostua». Hernaniko PSE-EEren jarrera goraipatu du H1! alderdiak, akordioaren aurka azaldu direlako, eta gaineratu, hernaniarren esku dagoela «efikaziarik gabeko sistema hau aldatzea». yy