Aztiker enpresak Atez Atekoari buruz egindako inkestaren datuak eman zituen Udalak joan den astean. Bigarren inkesta da, 2009 bukaeran egin zen lehenengoa. Bi inkestetako datuak aztertuta, Iñaki Arratibel Hamaikabat alderdiko bozeramaileak salatu du Gobernu Taldeak gezur berriak behar dituela aurrekoak ezkutatzeko. «Bi inkestak konparatu besterik ez dago Marian Beitialarrangoitiak eta bere taldeak datuak manipulatzen dituztela ikusteko (http://h1hernani.wordpress.com/)». Eta gaineratu du: «Gure ustez, Atez Atekoaren aldekoek inkesta manipulatuak erabili behar dituzte herritarren babesa justifikatzeko. Erreferenduma eskatzen zuten hernaniarren milaka sinadura zakarretara bota zituzten berberek». Datuei erreferentzia eginez honakoa azaldu du: «2009an Alkateak esan zuen Atez Atekoak zuen babesa %46,7koa zela, orain dirudienez, babesa %20koa zen soilik. Bigarren inkestan, azterketa demoskopikoak dio %64,6a ondo egokitu dela eta 2009ko inkestak zioen %73,3ak ez zituela arazoak izango Atez Atekora egokitzeko. Datu hauek argi uzten dute moldatu ezin diren pertsonen kopurua hazi egin dela eta hainbeste goraipatu den Atez Atekoaren erosotasuna ez doala bat hernaniarren iritziarekin». Gezur gehiago ere badirela nabarmendu du Arratibelek prentsa oharrean: «Atez Atekoa sistemarik merkeena dela esan izan da. Hamaikabatek emandako datuen arabera, Zerbitzu Publikoetako zinegotziak onartu egin behar izan du Atez Atekoa garestiagoa dela; hori bai, bere esanetan nabarmentzeko moduko alderik ez dago. Dirudienez, 900.000 euroko defizitak ez du kezkatzen. Hamaikabat alderdiak dio Atez Atekoa bertan behera utzi daitekeela, Alkateak esan ez bezala, eta gezurrezko inkesten gainetik, hernaniarren nahia dagoela. «Hernaniarrak izango dira maiatzeko hauteskundeetan erabakiko dutenak Atez Atekoa mantendu nahi duten edo ez. Hamaikabatetik argi dugu: bosgarren kontenedorea jarri behar dugu».