Bihar jarriko da abian goi-mailako Kutxa Saria 2011 Txapelketa. Gipuzkoako Euskal Pilota Federazioak antolatutako lehiaketa honek Euskal Herriko pelotaririk onenak biltzen ditu eta bertan izango da Goiatz Manzisidor hernaniarra. Manzisidorrek Amaya Serre baxenafartarra izango du bikote eta datorren igandean sartuko da txapelketan. Muneta eta Graciet-en aurka jokatuko dute, 11:30etan Hernanin. Ondoren, Etchelecu-Montes eta Espinar-Ruiz de Larramendi neurtuko dira.
Txapelketari ekiteko, bihar ere bi partidu izango dira, 11:30etan Zumarragan: Elguezabal-Arozena/Etchelecu-Montes; eta Caset-Mendizabal/Muneta-Graciet. Finala otsailaren 26an jokatuko da Tolosako Beotibar pelotalekuan.
Lehiaketa sistema
Antolaketa Batzordeak 12 pilotari hautatu ditu, 6 bikote osatuaz. Bikote hauek bi multzotan banatu dituzte, hiruna bakoitzean. Multzo bakoitzean joaneko ligaxka bat jokatuko dute, denek denen aurka. Ligaxkaren amaieran lehenengo eta bigarren postuetan sailkaturiko bikoteek, elkarren artean gurutzatuta, finalerdiak jokatuko dituzte norgehiagoka batera. Finalerdietako irabazleek finala jokatuko dute eta, galtzaileek, berriz, 3. eta 4. postua.