ELA, LAB, STEE/EILAS, EHNE eta HIRU sindikatuek greba orokorra deitu dute urtarrilaren 27an, ostegunean, Espainiako Gobernuak egin nahi duen pentsio erreformaren aurka eta Hernaniko Ezker Abertzaleak bat egiten duela jakinarazi du.
«Espainiar Gobernua, Europa eta munduko botere ekonomikoen irizpide eta aginduak beteaz, langileriaren aurkako neurri basatiak bultzatzen ari da. Eremu sozialeko hainbat neurri bertan behera utzi ditu, lan erreformaren aldaketari ekin dio eta orain pentsioen erreforma burutu nahi du», azaldu du.
«38 edo 40 urte kotizatzera behartuta izango gara»
Pentsio erreforma honekin, PSOEren Gobernuak langileen aurkako neurri zehatzak hartu nahi dituela dio Ezker Abertzaleak: «erretiro adina 67 urtetara luzatu, pentsioa eskuratzeko kotizazio aldia areagotu… Guzti hau gauzatzeko oinarri erregulatzailea kalkulatzeko urte gehiago hartuko dituzte kontuan; gaurdaino azken 15 urteak hartzen baziren kontuan, baliteke hemendik aurrera 20 edota 25 izatea. Modu honetan pentsioen %100era iristeko 38 edo 40 urte kotizatzera behartuta izango gara, hau da pentsioek izan beharko luketen erosteko ahalmenari eusteko betebeharra ezabatuko dute».
Eta gaineratu du gero eta gehiago pentsio eskubiderik gabe geldituko direla: «Lan merkatu prekario honetan, zatikako jardunaldiekin, aldi baterako enpleguarekin eta kale gorrira botatzeko erraztasun guztiekin, praktikan ezinezkoa izango da eskatzen dituzten urte guztiak betetzea eta, hortaz, gero eta jende gehiago pentsio eskubiderik gabe geldituko da».
Horrez gain dio PSOEK, PPk eta PNVk euren eredu sozio-ekonomikoa inposatu nahi dutela: «Krisi ekonomikoaz baliatzen dira langileon aurkako neurri basati eta lotsagarriak adostu eta onartzeko».
Ezker Abertzaleak grebarekin bat egiteaz gain, mobilizazioetan parte hartzeko deia luzatu du.