Joane Rodriguez (MIRa prestatzen), Miren Zubillaga (Medikuntza ikasten) eta Maitane Morales (Enpresen Zuzendaritza eta Administrazioko Lizentziatura ateratzen) Biteriko ikasgelan aurkitu ditu Hernaniko Kronikak. Azterketa garaia da eta egun guztia bertan pasatzen dute, 11:00etako eta 18:00etako ordubeteko deskantsua kenduta. Nahiago dute bertara joan ikastera, etxean deskonzentratzeko aukera gehiago dituztela eta. «Beti dago zerbait edo baten bat. Eta hemen txokolaterik ez dago (barrez)», diote. «Gainera hemen, besteak ere ikasten daudenez, horrek ikastera bultzatzen zaitu», gaineratu du Rodriguezek. Izan ere, ez dira bakarrak, azterketa garai honetan ikasgela lepo izaten da. Baina, azken finean, kurtso guztian dabiltzala azaldu dute: «MIRa dela eta, zazpi hilabete daramazkit egunero etortzen», dio Rodriguezek. «Ikasketa sistema aldatu digute eta azterketak kurtso osoan zehar dauzkat, beraz gehiago etortzen naiz», azaldu du Zubillagak. Eta Moralesek: «azterketa garaiaz aparte, nik ohitura dut urtean zehar ere larunbat goizetan etortzeko».
Larunbat arratsaldetan
zergatik ez ireki?
Ikasgela kurtso osoan dago zabalik astelehenetik ostiralera 09:00etatik 21:00etara eta larunbatetan 09:00etatik 13:00etara. Igandetan ere irekita egotea gustatuko litzaiekeen arren, ulertzen dutela azaldu dute hiru hernaniar gazteek, baina larunbat arratsaldetakoa ez dute hain argi ikusten. «Kultur Etxea itxita egongo balitz tira, baina irekita egoten da. Zine emanaldia izaten da eta ez dugu oso ondo ulertzen zergatik ikasgela ezin den ireki. Gutxienez, azterketa garaian».