Hernaniko Musika Bandak 150 urte betetzen ditu aurten eta urteurrena ospatzeko egitarau musikal zabala prestatu du. Urteroko kontzertuez gain, kontzertu bereziak eskainiko ditu bakarka, eta Hernaniko musikarekin loturik ibiltzen diren beste talde batzuekin. Talde ezberdinekin, esaterako, Bandak kaldererotan parte hartuko du 50. urteurrena dela eta; San Joanetan, San Joan Konpartsako gaia izango da; Euskal Jaietan, bertso eskolarekin kontzertu bat emateko asmoa du; urriko lehenengo asteburuan, ekitaldi berezia egingo du Kantuz eta Ozenki Abesbatzekin, txistulariekin... Eta bakarka, dantzen inguruko kontzertu komentatua, Santa Zezilia kontzertua rock-aren inguruan... Zipri Otxandorenak atzo prentsaurrean azaldu zuen egitaraua prestatzerakoan kontuan izan dutela herriari begira ospatu nahi zutela, bai publikoaren aldetik eta baita parte hartzaileen aldetik ere. Eta hori kontuan hartuta prestatu dute. Horrez gain, urteurren honetan, gogoan izango dituzte bandan jotzen aritu eta bandari eskainitako piezak sortu dituzten kide ohiak. «Adibidez, Matias Martinez, 70. hamarkadan musika eskolako irakasle izan zena, eta baita Joaquin Ortega ´Canario` ezaguna ere», azaldu zuen.
Hiru banda Hernanin
Azpimarratzeko kontzertuen artean, maiatzaren 14an antolatu duten banden alardea aipatu zuen. Alarde horretan, Hernaniko Bandaz gain, Irungoak eta Errenteriakoak ere hartuko dute parte. «Ez dugu gogoratzen Hernanin antzekorik ospatu izan denik».
Argazkiak uzteko deia
Urteurren honetan, musikak pisu gehiena izango duen arren, beste ekitaldi batzuk ere antolatu ditu Bandak, Juan Arzallus presidenteak azaldutakoaren arabera. Alde batetik, Musika Bandaren historiari buruzko liburua argitaratuko dute Urko Apaolaza historialari hernaniarrak egina. Bestetik, argazki erakusketa egiteko asmoa dute martxoan, eta herritarrei dei egin diete Bandarekin lotutako argazkiak uzteko eta daukaten informazioa emateko. Torres argazkidendan utzi behar dira. Azkenik web orria jarriko dute martxan, hilabete honen bukaeran: www.hermuba.com.
Hernaniko banda, hernaniarren lokarri
Hernaniko Musika Bandak 150 urte ditu soinean eta harro daudela azaldu zuen Arzallusek, baina baduela beste meritu garrantzitsuago bat: «mende eta erdian Hernaniri eta hernaniarrei estuki lotua egon da, Musika Banda hernaniarren lokarri izan baita».