euskal Herriko bost sindikatuk Greba Orokorra deitu dute urtarrilaren 27an, Errespetatu herritarren eskubideak lemapean. ELA, LAB, STEE/ EILAS, EHNE eta HIRU sindikatuek deitu dute Gobernuak egin nahi duen Pentsio Sistema Publikoaren erreformaren aurka. Manifestazioak Euskal Herriko probintzietako hiruburuetan egingo dira, goizean. Gipuzkoakoa Donostian izango da, goizeko 11:30etan. Arratsaldean berriz, eskualdeka egingo dituzte manifestazioak, eta Buruntzaldekoa Hernanin izango da; arratsaldeko 18:00etan abiatuko dira Gudarien Plazatik.
Erreforma berriak aurreikusten dituen neurriak
Espainako Gobernuak Pentsio Sistemen erreforma egitea aurreikusi du, eta ELA eta LAB sindikatuek atzoko agerraldian adierazi zutenez, ondorengoak izango dira hartuko diren neurriak: erretiro adina 67 urtera luzatzea; pentsioa jasotzeko kotizazio urteak luzatzea; arautzeko oinarria kalkulatzeko urte gehiago hartzea kontuan: «orain 15 urte hartzen badira kontuan, baliteke 20 edo 25 hartzea hemendik aurrera. Honek gure pentsioak %20 edo gehiago murriztuko lituzke»; jasotzen den diru kopurua murriztea kotizazio urteen arabera: «100%heltzeko 38-40 urte kotizatuta edukitzea nahi dute».
Ordezkariek azaldu zutenez, erreforma honekin, praktikan, eskatzen dituzten urte guztiak betetzea ezinezkoa da: «lan merkatu prekario honetan, lanaldi zatikatuekin, aldi baterako lanekin eta kale gorrira botatzeko duten erreztasunekin, geroz eta jende gehiago geratuko da pentsio eskubiderik gabe».
Hori guztiaz gain, gaineratu zuten pentsio sistema publikoarekin bukatzea dela beraien helburua, beti ere, pentsio sistema pribatuen mesedetan : «bankuek markatzen dute jarraitu beharreko bidea, eta institutzio guztiek bat egiten dute horrekin, berdin Gasteiz, Iruña eta Madrilgoek, edota PSOE-PSE, PNV edo UPN alderdiek.
Hernanin, oraingoz, zazpi enpresa haundik egin dute bat
Greba Orokorrarekin
Atzo jakinarazi zutenez, Hernanin, oraingoz zazpi enpresa haundi dira Grebarekin bat egin dutenak: Gureola, Ubis, AMR, Arkema, Ferronia, Loire eta Arcelor Mittal.