Bihotzekoak emandakoan, heriotza saihestu ahal izateko, hiru desfibrilagailu jarri ditu Udalak

Hernaniko Udalak hiru des­fibrilagailu automatiko ja­rri ditu Hernaniko bi eraikin publikotan. Desfibrilagai­luak bat-bateko heriotzak saihestu ahal izateko erabiltzen dira: norbaitek bihotzekoa izandakoan erabiltzen dira, eta bihotzekoa izan eta berehala erabiltzen badira, oso erangikorra izaten da. Udalak aparatuak duen eraginkortasunagatik erabaki du eraikin publikoetan jar­tzea. Eta baita ere jende pilaketa dagoen lekuetan jartzea gomendatu dutelako hainbat erakundek.

Momentuz, hiru aparatu
Orain arte hiru aparatu jarri ditu martxan Udalak: bi Kiroldegian daude (horietako bat gimnasioan) eta beste bat Biteri kultur etxean.
Kronikara bidalitako oharrean azaldu dutenez, desfibrilagailu automatikoak erabil­tzea erraza da, eta martxan jarri beharra tokatuz gero, edonork egin dezake, beti ere jarraibideei kasu eginda. Biho­tzekoa izan duen pertsonari bi elektrodo (pegatina modukoak dira) jarri behar zaizkio: bat eskuineko klabikulan, eta bestea ezker saihets inguruan. Makinak diagnostikoa egingo dio, eta deskarga ematea ko­meni den edo ez erabakiko du. Deskarga ematea gomendagarria dela uste badu, aparatu jarri duenak atzera egin beharko du, eta deskarga bideratu. Bitartean, larrialdi zerbitzuetara deitzea funtsezkoa da.