Hernaniarrek eman dute Atez Ateko hondakinak biltzeko sistemaren inguruan duten iritzia: alde %54,8 daude, kontra %39, 4 eta %5,8ak ez daki. Hernanin, sistema ezarri aurretik %20a zen Atez Atekoaren aldekoa; aurkakoak %37,7 ziren; eta %42,3k zalantza zuten. Sistema jarri aurretik alde agertu ziren ia guztiek bere horretan jarraitzen dute, eta %4k aldatu du iritzia. Aurretik zalantzak zituztenetatik, egun, gehienak sistemaren aldekoak dira: %65,6 sistemaren aldekoak dira orain eta %26,3 aurka daude. Aztiker enpresak egin du inkesta, Hernaniko Udalak aginduta, sistemaren inguruan herritarrek duten astebetetzea eta iritzia biltzeko. Atzo egindako agerraldian aurkeztu zituzten emaitzak. Asier Etxenik adierazi zuenez, inkesta Atez Atekoa martxan jarri eta 6 hilabetera egin zuen Aztikerrek. Helburua izan da jakitea herritarrak nola moldatu diren sistemarekin, nola baloratzen duten, sistema hobetzeko egiten dituzten proposamenak jakitea eta sistema berriak eman dituen emaitzen balorazioa egitea. 504 elkarrizketa egin dituzte.
Hamarretik zortzik larritzat jo dute pertsonako sortzen den hondakin kopurua
Inkestaren aurreneko partean, hondakinen kudeaketari buruzko galderak egin zizkieten herritarrei. Pertsonako sortzen den hondakin kopuruak gizartean sortzen duen arazoa baloratzerako orduan, elkarrizketatuen %80,1ak egoera larria edo oso larria dela erantzun du. Eta erraustegiari buruz galdetutakoan, elkarrizketatuen erdiak baino gehigok (54,6) aurkako iritzia agertu dute. Aldeko iritzia %18,5ak eman du.
%64,6 ondo edo oso ondo moldatu da sistemarekin
Herritarrek Atez Atekoarekin izan dituzte bizipenei buruz, eta hobetzeko dituzten proposamenei buruz ere galdetu du Aztikerrek. Sistema berrira nola moldatu diren galdetuta, hernaniarren %64,6ak erantzun du ondo edo oso ondo moldatu dela. Erdipurdi %17,3 moldatu da, gaizki %10,5 eta oso gaizki %7,6. Gaiak banatzeari dagokionean, inkestaren arabera, herritarren %67,3ak ez du zalantzarik izan banaketa egiteko momentuan. Herritarren %32,8ak berriz, arazoak izan dituela erantzun du. Ordutegiarekin ere, hamarretik zortzik ondo moldatzen direla azaldu dute. Larrialdi guneak izan dira inkestako beste bi galderen gaiak. Aurrenekoak, ondo antolatua al dauden galdetu dute, eta herritarren %68,6k baietz erantzun du. Ezetz erantzun duen %31,4ak adierazi du, besteak beste, garbitasun falta eta kokapen arazoak (urruti) medio bozkatu duela ezetz. Hala ere, erabilpenari dagokionean, %92,4ak ez duela inoiz erabili erantzun du. Gutxi batzuetan erabili dutenak %6,8 izan dira; eta astero erabili dutenak %0,8. Martxan jarri zenetik askotan hitz egin da hondakinak beste herri batera eramateari buruz. Inkestaren arabera, hernaniarren %74,7ak ez du inoiz hondakinik eraman beste udalerri batera; %18,1ak gutxi batzuetan eraman du; %3,2ak hilero; eta %4ak astean behin gutxienez. Hobetzeko proposamenen inguruan ere galdetu du Aztikerrek. Zerbitzua zabalduko balitz, eta gai bat aukeratu beharko balute, gehienek materia organikoa biltzeko dauden egunak zabalduko lituzkete, %43,1ak. Ondoren, %21k ontzi arinak biltzeko egunak ugarituko lituzke. Proposamen irekiak egiterako orduan %31,5ek ez du sistema hobetzeko proposamenik egin. Gainerakoan, ondorengo proposamenak azaldu dira gehien: altzariak eta abarren zerbitzua dohainik izatea, papera biltzeko beste sistema bat bilatzea, eta Garbigune bat herrian edo herritik gertu jartzea. Atez Ateko sistema orokorrean hartuta, balorazio ona edo oso ona egin du elkarrizketatuen erdiak %50,3ak; beste 22,8k erdipurdikotzat jo du; eta %26,9k balorazio txarra egin du. Ahaleginari dagokionean, herritarren %62ak uste du ahaleginak merezi izan duela, eta %11,4ak Atez Atekoaren datuak onak direla adierazi du, baina ahalegina gehiegizkoa dela.
Alkatea: «Atez Atekoaren emaitzak oso onak dira, herritarrak pozik daude eta sistema atzeraezina da»
Inkestaren emaitza jakin ostean, Alkateak ondorioen berri eman zuen: «Hernaniarrek aurrerapauso ikaragarria eman dute eta hor ez dago atzera egiterik. Agerian geratu dira nola edo hala aurka egin nahi ziotenek erabilitako aitzakiak gezurretan oinarritzen direla. Guk askotan esaten genuena galdeketak erakutsi du. Sistema erosoa dela erakutsi digute herritarrek. Iritzia bat edo bestea izan, jarrera arduratsua erakutsi dute. Horregatik zoriondu egin nahi ditugu hernaniarrak».