Gipuzkoako Foru Aldundiak hasi ditu Hernaniko bariantea bikoizteko lanak; atzo jarri zuten lehenengo harria. Bertan izan ziren Markel Olano Diputatu Nagusia, Eneko Goia Bide Azpiegituretako Diputatua eta Juan Karlos Plazaola Hernaniko zinegotzia. Olanok azaldu zuen harro egoteko eguna zela «Urumeako autobiaren azken urratsa delako hasi berri dena, legegintzaldi honetako urrats haundienetako bat». Bariantea bikoiztuta, Urumeako autobia osatuta geldituko da, Andoain eta Donostia arteko N-1 errepideko trafikoa arintzeko asmoarekin. 30.000 ibilgailu ibiltzen dira egunean.
Portu, Urumea eta Martindegiko
zubibideak eraiki
Hernaniko barianteak 4 karril izango ditu (egun, 2) 2,4 km-tan barrena. Aurrekontua 24 milioi euro izango da eta lanak egiteko 2 urteko epea ezarri da.
Bariantea bikoiztuko da, egungo bariantearen trazatua jarraituta. Portuko, Urumeako eta Martindegiko zubibideak eraiki beharko dira, eta Hernaniko erdigunerako lotunea eraldatu beharko da. Horrez gain, egin nahi duten Abiadura Haundiko Trenaren ibilbidearen gaineko pasabide bat eraiki beharko da.