Zikuñagako Ama berreskuratzeko lanetan, beste pausu bat emango du herri plataformak. Hala azaldu du Kronikara bidalitako prentsa oharrean. Eta jakinarazi du, «Zikuñagako Amaren espoliaziotik edo denboraldi bateko bahiketatik 31 urte pasa diren arren», salaketa jarriko dutela Ertzaintzan. «Gertatu zena berriro eraiki dugu, guk uste dugun bezala, eta nahikoa datu baditugu Ertzaintzan salaketa jartzeko. Hari-mutur batzuk solte daude eta guztiak lotzean, berehala jarriko dugu salaketa».
«Zergatik ez zuten salatu?»
Lapurreta egin zuten urtean esan zen, Erik el Belga ezizena duen lapur ezaguna izan zela Zikuñagako Ama lapurtu zuena, baina hori gezurtatu egin zuen Zikuñagako Amaren Komisioak eta herri plataformak ere gauza bera dio. (2010/10/05eko Kronikan argitaratu ziren datu horiek). Eta herri plataformak datu berriak aurkitu ditu. «Zikuñagako ermitako seroraren gizonak adierazpen batzuk egin zituen, eta adierazpen horietatik abiatuta behin baino gehiagotan jarri gara harremanetan Gotzaintzarekin eta Zikuñagako Papelerako zuzendaritzarekin. Emaitzik ez dugu lortu, orain arte. Ondarea Berreskuratzeko Eragile Taldearekin jarri gara harremanetan eta baieztatu digute pentsatzen genuena: ez Hernaniko Guardia Zibilaren koartelean ezta beste polizia organismo batean ere, ez zela lapurreta salatu».
Horrek zer pentsatu eman diela diote: «Hernaniko parrokoak eta elizbarrutiko Gotzainak lapurreta baten aurrean ezikusiarena egin zuten modu susmagarrian. Zergatik ez zuten salatu? Argi daukaguna da, jarduteko modu kafkiano horrekin ez ziotela mesederik egin herriko katolizismoari. Gero harritu egiten dira elizak erdi hutsik daudelako».