EZKURRAK 30
SAN MIGUELEK 26
KOTETO Ezkurra da txapeldunen txapeldun. Orona torneoa irabazi zuen atzo Julen San Miguel gaztearen kontra, 30-26, erremontista onenek jokatzen duten neguko torneoa, hain zuzen. Sakearekin sekulako mina egin zion Ezkurrak San Migueli. Pelota «bihurriak» zirela esana zuen Ezkurrak, partidu aurretik, eta zuku ederra atera zien, 10 tanto egin baitzituen jokaldi horrekin. «Saihetsagotik ateratzen saiatu naiz, pelotaren bote bihurria aprobetxatu nahirik, eta asmatu egin dut». San Miguelek ere ondo sakatu zuen; 7 tanto egin zituen saketik, eta batez ere, aldea errestoan egon zen.
Peloteoz urri,
emozioz gainezka
Izugarrizko emozioa izan zuen partiduak. 23-23 berdindu zuten arte, bi pelotariak elkarri gaina hartu ezinda. Berriz ere, Ezkurrak aldegingo zuela zirudien, Buruz Buruko Txapelketa Nagusian bezala. San Miguelek gehiago eutsi zion ordea, eta 25-24, 27-25 ere izan ziren. Ezkurrak hortxe erakutsi zuen bere tenplea; sakez tanto bat, peloteoan bestea... 29-25. San Miguelek azken kolpea jo zuen, 29-26, baina ez zegoen txapeldun haundienari trofeoa kentzerik! 30-26, eta justizia egin zen: onenak irabazi zuen.
Koteto indarberritua
Koteto Ezkurrak ezin zuen ilusioa ezkutatu partidu bukaeran. Pelotengatik izandako beroaldia ahaztuta, aurrerako ilusioz dagoela azaldu zuen doneztebarrak. Orona Torneoa irabazi du Ezkurrak, erremontista onenek jokatzen duten torneoa; txapeldunen torneoa. Bera da, txapeldunen txapeldun, bera da oraindik izan haundiena, urte kaxkar batzuk pasa dituen arren. Buruz Buruko Txapelketa Nagusia irabazi zuen abuztuan, eta Orona Torneoa atzo, kontrario berdinaren kontra. Julen San Miguelek ez du zorterik onena izan; joku puntu ederrean da Doneztebeko gaztea, baina Ezkurrarik onena tokatu zaio aurrean, bi aldiz jarraian. Hurrengo aukeraren zain egon beharko du.