Eskuz esku, Atez ate: ondo ari gara, lemarekin, agerpen publikoa egingo du gaur Hernanin Zero Zabor taldeak. Bilera motz bat egingo dute, argazkia atera, eta agiri bat irakurriko da: Eskuz esku, Atez ate: ondo ari gara; eta erderaz, Mano con mano, Puerta a puerta: lo estamos haciendo bien. Bilkura, 12:30etan egingo dute, Gudarien plazan, eta dei egin die herritarrei bertara azaltzeko.
«Hilabeteotan
sekulako pausoa»
Hondakinak Atez Ate gestionatzen hasi zirenetik gaur egunera hilabete asko pasa dira, eta balorazio oso ona egin du Hernanin Zero Zabor taldeak, Hernaniko Kronikara bidali duen prentsa oharrean.
HZZko kideek diotenez, «hilabeteotan sekulako pausoa eman dugu Hernanin gure hondakinak tratatzeko moduan, gure kondarren hiru laurdenak zabortegira bidaltzetik %80 baino gehiago ondo bereizita eta birziklatzeko moduan biltzera pasatu gara. Gainera, 700 familia baino gehiagok, konposta egiten du. Badakigu badaudela gauzak hobetu beharrekoak, baina egin den bidea izugarri inportantea da. Hernaniarrok dagoenekoz ez daukagu errauste planta beharrik, ez gure buruak eta ez munduko beste inor ez dugu kutsatuko, daukagun Atez Ateko sistema askoz hobea da, merkeagoa eta oso erreza».
«Errespeto haundiagoz tratatu Hernani»
HZZk mezu bat bidali nahi die bilkura honekin, komunikabide haundiei, enpresa haundiei eta horien interesak defendatzen ari diren politikoei, eskatuz errespeto haundiagoz tratatzeko Hernani. «Oraindik bilketa ondo egin nahi ezik dabiltzan herritar bakanei eskatzen diegu, uzteko alde batera beren egoskorkeria».
HZZk dio, beren mezua alaia dela. «Atez Atekoarekin ez dago galtzailerik; denok irabazi dugu, dirutan, ingurumenaren kalitatean eta denon osasunean».