ELKARRI aukerarik eman gabe, 23-23 berdintzera iritsi ziren. Handik aurrera Ezkurra izan zen nagusi, eta 30-24ko garaipenarekin, beharrezkoak ziren 7 tantuak eginda, jantzi zuen hamargarren txapela Koteto Ezkurrak. Casino Kursaal Banakako Txapelketa Nagusiko finala izan zen hura, irailaren 5ean Ezkurrak eta San Miguelek jokatutakoa. Gaur aurrez aurre izango dira berriz, ez txapelketako partiduan, baina bai errebantxa usaina darion Torneoko finalean. Kanporaketa bikainak jokatuta iritsi dira biak Txapeldunen Orona Torneoko finalera, eta berriz ere, aurrez aurre izango dira momentuko bi erremontista onenetakoak, Ezkurra eta San Miguel. Finala Galarretan jokatuko da, eta arratsaldeko 16:00etan hasiko den jaialdiko bigarren partidua izango da.
Esperientzia,
Ezkurraren arma
baliotsuena
Esperientzia da Ezkurrak duen armarik indartsuena, eta horren erakusgarri dira Banakako Txapelketan irabazitako 10 txapelak. Horrez gain, hirutan ere izana da azpitxapelduna Txapelketa berean. Azken urtean ez du bolada ona pasa, eta kezka eta beldur askorekin ibili dela aitortu zion Kronikari Casino Kursaaleko finala jokatu aurretik. Orain ordea ,indartsu eta ilusioarekin dago, bai txapela irabazi zuelako, eta baita minik sumatzen ez duelako. Gaurko aurkaria ondo ezagutzen du, herritarra, Doneztebekoa izateaz gain, partidu dexente jokatu dituztelako elkarren aurka. Pelotari agresiboa bezala deskribatzen du, azkarra eta sake ona duena. Hala ere, konstantzia dela bere hutsune haundiena azaldu du, eta irabazteko klabea, hasieratik sakeak sartu eta partidutik ateratzea dela azpimarratu du.
Sasoia eta sakea,
San Miguelen klabea
Julen San Miguelentzat debut urtea izan da 2010eko Banakakoa. Gaztea da, sasoikoa. Ez du esperientzia haundirik, baina pelota inork baino azkarrago mugitzen du. Sakea da bere arma indartsuena, eta hanka biziak ditu. Casino Kursaal txapelketan lan asko egin ondoren iritsi zen finalera, eta Zeberio IIa bera ere kanporatu zuen. Gaurkoan, txapelketan gainditzea lortu ez zuen jokalaria izango du aurrean, Koteto Ezkurra. San Miguelek azaldutakoaren arabera, Ezkurrak hutsune gutxi ditu eta partidua irabazteko, beretzat, sakea da klabea. Kontzentrazioari eusten saiatuko da, partiduan hasieratik sartzea ezinbestekoa baitu.