EAJ-PNV alderdiak Kronikara bidalitako prentsa oharrean jakinarazi duenez, Gobernu Taldeak aurkeztutako 2011ko aurrekontuei zuzenketa osoa egingo die eta 1.037.212 euro aurrezteko modua azaldu du, «zorrik sortzen ez duen aurrekontu errealago bat proposatuz».
EAJ-PNVren arabera, aurrekontu hauen helburua da «Atez Atekoa mantentzea, kosta ahala kosta, aholkulari eta langileak modu librean izendatzen jarraitzea, gastuak murriztu daitezkeen lekuan zorrak areagotzea eta kirolari inongo garrantzirik ez ematea». Ongintzari dagokion diru kopuruarekin, berriz, ados dago, Zaharren Egoitza berria, apartamentu tutelatuak eta etxebizitza sozialak martxan jarriko baitira, baina pena dute aurreko urtean ez hartu izana erabaki hori.
1.037.212 euro aurrezteko
EAJ-PNVk dioenez, aurrekontu hauetan 1.037.212 euro aurreztu daitezke: «Hondakinen gestioari dagokion diru kopurua, 1.823.000 eurotaraino haziko da. Kopuru hori 1.400.000 euro izatea nahiko genuke eta hondakinen bilketa 5 edo 6 kontenedorerekin egitea. Gastu Juridikoetarako 58.584 euro izango dira. Kontusaila irekita mantentzea eskatzen dugu, epaitegietara jo behar den kasuetarako. Hala, 58.000 euro aurreztuko genuke. Modu librean izendatutako Gobernu Taldearen aholkulariak eta langileak desagertzea nahi dugu; 216.811 euro aurreztuko genuke. Ez dugu uste proiektu berriak lantzeko momentua denik eta kasu honetan ere, saila irekita mantentzea nahi dugu, 204.401 euro aurreztuz. Eta Sorgintxuloko urbanizazio lanetan, 135.000 euro aurreztea nahi dugu. Horrez gain, eskatzen dugu kooperaziora bideratutako diruaren %25a Angel Olaranen proiektura zuzentzea eta kirolari merezi duen lekua ematea».