GABONETAN, Hernanin, preso eta iheslarien aldeko ekimenak egiten ari da Amnistiaren Aldeko Mugimendua. Gaur urteko azken elkarretaratzea egingo dute, berezia, Plazan, 20:00etan abiatuta. AAM adierazi duenez: «2010 joan da, eta gaur, urteko azken ostirala eta azken eguna ditugu. Euskal preso politikoek beste 365 egun beltz ezagutu dituzte. Ahazteko moduko egunak, non eskubideen urraketa etengabekoa izan den».
Hala ere, itxaropena badutela adierazi dute Kronikara bidalitako oharrean: «kandelak eskuetan eta itxaropena gure buruei iltzatuta dauzkagu, aro berri bat zabaldu nahi dugu. Horretan ari gara buru belarri, eskubide guztien errespetua ardatz nagusi izango lukeen fase berri bat. Baita, gure senide euskal preso, iheslari eta errefuxiatu eta deportatu politikoena ere. Aurrera pausuak emateko garaia da. Bereziki txalotzen dugu Egin Dezagun Urratsa ekimenak sortu duen elkartasuna eta mobilizazio giroa. Elkartasun olatu paregabea ari gara sortzen, eskubideen aldeko tsunamia!».
Urtarrilaren 8an, manifestazioa
Urtarrilaren 8an Bilbon egingo den manifestaziorako deia egin dute: «kaleak bete behar ditugu, urratsa eman behar dugu guztion artean». 17:30etan izango da, eta joateko, autobus zerrendak jarri dituzte: Goiz Argin, Riojan, Oinddin eta Garinen.