Aste honetan sartu da Bertsolata ekitaldi bete-betean. Gaur hasi eta errege eguna bitarte, 4 ekitaldi dituzte, Hernaniko Iraulio Panttalone Bertso Eskolako kideek. Gaur Ornitorrinkus ekitaldi esperimentala izango da, Milagrosan, 19:00etatik aurrera. Ostegunean, web orrialde berria aurkeztuko dute, Biterin. Ostiralean, Urte Zaharretako Errondan ibiliko dira kalean barrena, Ohitura Zaharrak Abesbatzarekin batean. Datorren astean, errege egunarekin, bertso jaialdia dute, Biterin, 6 bertsolari puntakorekin: Unai Iturriaga, Amets Arzallus, Miren Amuriza, Unai Agirre, Iker Zubeldia eta Asier Azpiroz.
Lan esperimentala, gaur
Bertsolatak ohitura duen modura, bertsoaren inguruan egiten diren lan bereziak ere ekarri nahi izaten dituzte Hernanira. Gaurkoa horietako bat izan liteke, eta gainera, bi hernaniar dira protagonista. Ornitorrinkus izeneko CDa aurkeztuko dute Maialen Lujanbiok (bertsoa), Judith Monterok (saxoa) eta Xabier Erkiziak (musika elektronikoa).
Lehendik ere bi emanaldi egin ditu hirukote honek Hernanin. 2007an hasi zuten ibilbidea, eta aurten kaleratu dute CD itxuran, ibilbide horren emaitza izan litekeena. Gaur, emanaldiaz gain, komentatu ere egingo dute euren lana. Bakoitzak bere esparruan bide berriak bilatu nahi izan ditu, eta Ornitorrinkus da horren emaitza. Aportazio berri bat, errez definitu ezin den emaitza bat, dena definitu edo sailkatu behar horretatik aldegin nahian, sortutako obra.
CDa salgai dago Hernanin, Doberan eta Kronikan, bazkideentzat 12 euroan; bazkide ez direnentzat 15 euroan.
Milagrosan da emanaldia, 19:00etan. Sarrerak bertan salduko dira, 5 euroan.
BERTSOLATA EKITALDIAK
GAUR - ABENDUAK 28:
Ornitorrinkus:CD aurkezpena: Maialen Lujanbio, Judith Montero eta Xabier Erkizia. 19:00etan Milagrosan. Sarrerak: 5 euro.
ABENDUAK 30:
Web gune berriaren aurkezpena: Hernani Bertsotan proiektuak bigarren zatia aurkeztuko du. DVDak salgai izango dira bertan.
19:00etan Biteri kultur etxean.
ABENDUAK 31:
Urte Zaharretako Erronda: Kalez kale eskean ibiliko dira errondan, Ohitura Zaharrak Abesbatzak antolatuta. 17:15etan abiatuko dira Plazatik.
URTARRILAK 6:
Bertso Jaialdia: Bertsolariak: Amets Arzallus, Unai Iturriaga, Unai Agirre, Miren Amuriza, Asier Azpiroz eta Iker Zubeldia. Gaijartzailea: Amaia Otxotorena. Sarrerak salgai: Aralar eta Tripontzi tabernetan, 7 euroan.