Ongintza Udal Patronatuak, apartamentu tutelatuak, etxebizitza tutelatuak eta harrerako etxebizitzak ditu behar gehien dituzten sektoreentzat, eta aurreko astearteko Plenoan, horien erabilera arautzeko ordenantza onartu zuen Udalak. Hasierako onarpena eman zion Plenoak eta orain, hilabetez alegazioak aurkezteko aukera dago. Ondoren, behin betiko onarpena emango zaio eta indarrean jarriko da ordenantza. Udalak azaldu duenez, bizileku horien helburua da salbuespenezko arrazoiren batengatik etxebizitza premia larrian daudenei denboraldi baterako ostatu ematea.
Erabiltzaileen arabera
Erabiltzaileen ezaugarrien arabera, hiru bizileku mota izango dira: 60 urtetik gorako pertsona autonomoentzat apartamentu tutelatuak izango dira; bizikidetza-unitateentzat edo inolako familia-loturarik gabe elkarrekin bizi direnentzat etxebizitza tutelatuak; eta emakumeen aurkako indarkeriaren biktimentzat; emakumeentzat zein horien mende dauden seme-alaba eta senitartekoentzat harrerako etxebizitzak.
Ordaindu beharrekoa zehaztuta
Udalak zerbitzu horiek arautzeko ordenantza fiskala ere kaleratu du eta horien erabiltzaileek ordaindu beharrekoa zehaztu du. Apartamentuen erabiltzaileek hilean ordaindu beharreko tasa hileko diru-sarrera baliokidearen %30 izango da, eta gutxienez 200 euro ordainduko dituzte. Etxebizitzen kasuan, hilean ordaindu beharreko tasa hileko diru-sarrera baliokidearen %10 izango da, eta gutxienez 100 euro ordainduko dituzte. Harrerako etxebizitzen kasuan, erabiltzaileak Hernanin erroldatuta badaude, ez dute tasarik ordaindu behar, eta beste udalerrietako erabiltzaileek, 200 euro hilean (erroldatuta dagoen Udalak ordainduko du). Informazio gehiago, Ongintzan.