«Hondakin organikoa Lapatxeko plantan konpostatzeko gaitasuna kolokan ikusten dugu, prozesuan ematen diren arazoak nabariak dira eta konposta plantak egun jasotzen duen organiko kantitatea tratatzeko gaitasunik ez du», azaldu zuen atzo Jon Kortajarena Garbitaniako ingurumen teknikariak. «Harrera gunean bildutako organikoa tapatu gabe egoten da eguraldiaren eraginpean, nahastu egiten dute atez ate eta 5. kontenedoretik bildutakoa, fermentazioari dagokionean, behar adinako tenperatura lortzeko arazoak daude eta jarduerari dagokionean Lapatxek 208 T tratatu ditzake hilabetean eta irailean bertan 440 T sartu ziren», izan ziren emandako datu batzuk. Datu horiek prentsaurrean eman zituzten atzo Usurbil, Oiartzun eta Hernaniko Udal ordezkari eta ingurumen teknikariek, organikoaren inguruko analisia azaltzearekin batera. Eta Gipuzkoako Hondakinen Kudeaketa entitateak esandakoa gezurtatu zuten, hau da, Atez Atekoa egiten duten hiru herrietan bildutako hondakin organikoa kalitate eskasekoa dela. «28 kontrol egin ditugu eta kalitate bikaineko organikoa da. Gainera, etxeko lanak egin ditugu eta zalantzan egon zitekeena bereizi dugu Lapatxera eraman gabe». Eta salatu zuten kalitate baloraketak hiru herrietako ordezkari teknikorik gabe egin direla, eta bertara joan eta gertutik gaia ezagutzeko eskaera egin denean ez zaiela erantzun.
«Herritarren lana zapuztu nahi dute»
Marian Beitialarrangoitia Hernaniko alkateak azaldu zuen lan on bati zigor politikoa eta ekonomikoa jarri nahi diotela «Atez Atekoa begitan hartu duten erraustezaleek. Organikoaren kalitatea txarra dela esanez, herritarren lana zapuztu nahi dute; guk zoriondu egin nahi ditugu». Interes politikorik gabeko azterketa egitea eskatu dute.