Europan galtzeko arriskuan dauden 7 landare aurkitu dituzte Hernanin, nahiko egoera onean. Ia denak erreka bazterretan aurkitu dira, eta orain erreserba hori mantentzeko planak egiten ari dira.
2007an Aranzadi Zientzia Elkarteak eta UPV-EHUko ikertzaileek Hernaniko natur-ondarea aztertu zuten, eta ordura arte ia ezezagunak ziren datu pila bat aurkitu eta azaleratu zituzten. Hernaniko Udalak EAEko saria jaso zuen, Udal mailako biodibertsitate lanik onenagatik.
Ordutik, Hernaniko natura zaindu eta ezagutarazteko hainbat proiektu jarri dira martxan, eta horietako bat da, hain zuzen, Iñaki Sanz-Azkuek egin duena, eta emaitza hain esanguratsuak eman dituena.
Hiru ikertzaile, bi urtez
Ibai Olariaga, Iñaki Sanz-Azkue eta Joserra Diezek egin dute ikerketa lana. Hernanik bailara itxi eta malkartsu asko ditu, erreka-ertz asko, eta horietan zentratu dira, egokiak baitira, landare mehatxatu horientzako. Metroz metro miatu dituzte erreka horiek, eta landare-sail txikiak GPSz markatu.
Europan zerrenda gorrian dauden 7 landare identifikatu dira Hernanin, eta egoera nahiko onean, gainera. Ikerketa hau egin aurretik, 3 landare zeuden identifikatuta: Hymenophyllum tunbrigense, Dryopteris aemula, eta Trichomanes speciosum. Orain, beste 4 espezie aurkitu dira, eta aurreko 3 espezie horien populazio gehiago ere bai.
Aiako Parketik kanpora ere, erreserba lekuak
Hernanik garrantzia haundia hartu du kontserbazionismo aldetik, ez bakarrik EAE mailan, baita Iberiar penintsulan ere. Gainera, landare mehatxatu horiek Aiako Parketik kanpoko erreketan aurkitu dira, eta horrek dakarki, aurrera begirako planen ikuspuntu aldaketa; diseinu aldaketa.
7 ESPEZIE MEHATXATU
- Hymenophyllum tunbrigense (inistor klase bat)
- Dryopteris aemula (inistor klase bat)
- Trichomanes speciosum (inistor klase bat)
- Prunus lusitanica (Erramu portugaldarra)
- Soldanella villosa (Landare txikia, lore morea)
- Stegnogramma pozoi (inistor klase bat)
- Veratrum album (landare luzea, lore horixka)