San Markoko presidenteak egin dituen adirazpenaren inguruan, Haimakabat alderdiak ustekabea eta kezka azaldu du Kronikara bidalitako prentsa oharrean. Alderdiak dionez, Juan Carlos Merino presidenteak Atez Atekoaren inguruko epaia betetzea saihestu nahi du: «Atez Atekoa martxan jartzeko, Udalak hondakinak kudeatzeko konpetentzia berreskuratu zuen akordio baten bitartez, eta epaiak akordio hori suspenditu du. Epaiak akordioa bertan behera uzten badu, akordio horrek ez du ezertarako balio. Suspenditutako akordioak konpetentziak berreskuratzeari buruz hitz egiten badu, berreskuratze horrek ez du baliorik; hortaz konpetentziak berriz San Markoren esku geratzen dira».
«Presidentea: epaiak
trasladoan du eragina»
Arratibelen ustez erraza dena konplikatzen ari dira. San Markorentzat hau «patata beroa» dela azaldu du, eta presidenteak ez diola garrantzia haundirik ematen epaiari: «hondakinen trasladoan bakarrik duela eragina azaldu du presidenteak. Gu harrituta eta haserre gaude. Bere adierazpenetan ezjakintasun haundia ikusten da, edo bestela, epaiarekiko duen ardura sahiestu nahi duela. Hau da, Justiziarekiko duen ardura, kaltea jasaten duten herritarrekiko ardura, eta baita Mankomunitearen interesen araberako ardura».
Hamaikabaten ustez, azken puntu honi buruzko epaia oso argia da: «errekurtsoaren interesen gainetik, Mankomunitatearen funtzionamentua babestea beharrezkoa da. Hori dela eta suspenditu dute Hernaniko Udalak konpetentziak berreskuratzea. Honen ondorioz, San Markok jaso behar ditu beira, papera eta ontzi arinak».
Hamaikabatek adierazi duenez, orain arteko sistemarekin jarraitzeko, San Markok eta Udalak akordio bat egin nahi dute, baina «jakin dezatela horrek ez duela alde batera uzten epaiak dioena, eta jasotze-kostuak Mankomunitatearenak izango direla». Azkenik jakinarazi du oposizioak bilera bat eskatu duela Mankomunitateko ordezkariekin, eta bilera horretan Hamaikabatek epaia betetzeko eskatuko diola, bai San Markori, eta baita Udalari ere.