Pablo Lasaren omenez urtero egin ohi den Artisau Azoka izango da gaur, goiz eta arratsalde, Atsegindegin. Goizean 11:00etatik 14:30etara izango da eta arratsaldean, 17:00etatik 20:00etara.
Bertan 27 postu izango dira; horien artean, 7 hernaniarrenak. Bitxigintza, artilezko eta ezkurrezko lanak, otargintza, egur taila, zeramika, ehungintza... Aukera mordoa izango da gaur Artisau Azokan. Eta gaurkoan, bolilloek izango dute protagonismo berezia. Hori dela eta, Idoia Ibañez artisau polifazetiko arrasatearra gonbidatu dute.
Gainerako artisauen artean, Euskal Herrian oso ezaguna den Edorta Murua izango da. Koadroak egiten ditu abesti tradizionaletan oinarrituta; batez ere Mikel Laboarenak dira. Anastasia Leunda hernaniarraren artilezko tanga eta bularretakoak ere izango dira. Pedro Pacheco arrasatearrak berriz, Oindi tabernako fatxadaren maketa ekarriko du, besteak beste.
Artisau lanez gain, taloak, elikagai ekologikoak, jaboiak, trikitixa eta haurrentzako eskulan tailerra izango dira. Zintzilikatzeko figurak egingo dituzte.
Tabernariei, eskerrak
Antolatzaileek eskertu nahi diete azoka aurrera ateratzen lagundu duten guztiei; tartean, Hernaniko tabernariei, erakutsi duten adeitasunagatik.