GipUzkoako Euskal Kantu Txapelketako finala izango da gaur eta bertan hartuko du parte Iosune Marin hernaniarrak. Irlaren aurrean, berak sortutako abestiarekin iritsi da finalera Marin. Azaldutakoaren arabera, «pop-rock estilokoa edo, nolabait esateko, Mikel Urdangarinen estilokoa da abestia». Finalean 16 partaide lehiatuko dira txapela eskuratzeko eta erdiak sorkuntza lanak dira, Marinena bezala. Epaimahaiak gehiago baloratzen ditu partaideek beraiek sortutako lanak izatea eta alde horretatik irabazteko aukera gehiago ikusten duen galdetuta, ezezkoa erantzun du gazte hernaniarrak: «maila haundia dago eta ezinezkoa iruditzen zait irabaztea». Marinek lehenengo aldiz hartu du parte txapelketa batean eta kanporaketa saioan oso gustora aritu zela azaldu du. Gaurko saioan ere gustora aritzeko asmoa du. Donostiako Antzoki Zaharrean izango da, 18:00etan.
Musika Eskolatik bultzada
Iosune Marinek 17 urte ditu eta txapelketan parte hartzen duen lehenengo aldia bada ere, txikitatik dabil musikan sartuta. 5-6 urtetatik Hernaniko Musika Eskolan dabil, egun, Joxan Goikoetxearekin, eta iaztik Donostiako kontserbatorioan ere bai. Berak egindako 6 abesti ditu eta azken biekin aurkeztu zen txapelketara, Musika Eskolako Susik bultzatuta. Hernaniko talde batean ere ibili zen Marin, baina bera bakarrik, gitarra lagun duela, hobeto moldatzen dela aitortu du. Hernanitik, txapelketan parte hartu dute baita ere, Arantxa Airak eta Gobara taldeak