Hamaikabat alderdiak Kronikara bidalitako prentsa oharrean adierazi duenez, azken asteetan hernaniarrek Unai Erroizeneak sinatutako gutunak jaso dituzte, eta bertan azaldutakoaren arabera «hernaniarrak bijilatzen ari dira, Udalak birziklapena ondo egiten ez dutenaren susumoa» duelako. Oharrean dioenez, gutun honetan ez da hautsitako legearen azalpenik ematen, eta ezta ere ustezko legea hautsi dela azaltzeko egin duten txosten teknikoaren berririk ematen: «ez dute probarik ematen, gutunean jartzen duen gauza bakarra da Udaleko Ingurumen Zerbitzu Teknikoak jakin du...».
«Akusazioa ez du inork hartzen bere gain, inork ez baitu erantzunkizunik izan nahi»
Alderiaren esanetan, akusazioa ez du inork bere gain hartzen, «inork ez baitu erantzunkizunik izan nahi, solik, jakin egin dute. Gutunaren amaieran berriz, diotena ondorengoa da: ohartarazpen honek erantzun ona izango duela espero dugu; hala ez balitz, tamalez, eta gure borondatearen aurka, bestelako neurriak hartu beharrean izango ginateke». Iñaki Arratibelen ustez, onartezina da administrazioak teknika hauek erabiltzea: «probaren pisu guztia akusazioan jartzen dute, ez dute urratutako legearen azalpenik ematen, ez dute akusazioa nork egin duen edo nondik jakin duten adierazten, eta abar. Gure ustez, horrelako gauzek erakusten dute Ingurumen Zerbitzuaren prozesu administratiboa gainbegiratuko duen teknikari bat behar dela; administrazioaren irregularitateekin bukatu nahi bada, beharrezkoa da». Hamakaibateko zinegotziaren ustez, Atez atekoak funtzionatzeko, Ingurumen Zerbitzua itsutu egin da kontrol sozialarekin: «Hamaikabat alderditik hernaniarrak babesik gabe uzten dituen metodo totalitario hauek salatzen jarraituko dugu. Horrez gain, herritarrei eskatzen diegu beldurrik ez izateko, eta horrelako gertaeren berri emateko. Ingurumen Zerbitzuak duen paranoia denon artean geldituko dugu».