Haurren Nazioarteko Eguna ospatuko dute gaur goizean zehar Chillida-Leku museoan, kirola ardatz hartuta. Festa solidarioa izango da eta bertan jasotako dirua ospitale bat berritzeko erabiliko dute, Ekuadorreko Franklin Tello ospitalea hain zuzen ere. Zuzendaria Manuel Armendariz da, eta laguntza Sport Mundiren bitartez emango zaie.
Bisita gidatuak, txokolatada, bizikletan paseoa, skate erakustaldia...
Museoan gaur egingo diren ekitaldi nagusiak kirolarekin lotura zuzena dute. Festa eguna goizeko 10:30etan hasiko dute, Sport Mundiren inguruko informazioarekin. Ondoren, Tonbola solidarioan parte hartzeko aukera izango da; euro batengatik opari ezin hobeak eskuratu ahal izango dira. Segidan, kirolaren txanda izango da. Txema Olazabal golfista hondarribitarra etorriko da Chillida-Lekura, golf erakustaldia ematera. Skatearekin Slalom erakustaldia ere izango da, Longboard modalitatean. Azken honetan parte hartu nahi dutenek skatea eraman dezakete. Goizeko 11:00etan bisita gidatua egin dezakete gerturatutakoek. Ondoren, kirolaren txanda izango da berriz ere. Etxetik bizikleta eraman, eta Juanma Garate txirrindulariarekin bizikletan museotik barrena paseoa egiteko aukera izango da. Eta azkenik, eguerdiko 13:30etan Luis Chillidarekin jasotako diruaren banaketa egin aurretik, txokolate goxoa jarriko dute gerturatuentzat, Gorrotxategik eskainia.