Pelotarako behar den guztia eskuragarri interneten, eta laster, Hernanin

Pelotan ibilia da Koro Barrenetxea hernaniarra eta orduan eta orain, 15 urte be­randuago, pelotako materiala eskuratzeko aukera gu­txi dagoela ikusita, pelota den­da bat on line jartzea erabaki zuen, hau da, interneten. Pelotadenda.com helbidean pe­lotarako behar den guz­tia dago eskuragarri, mundu guz­tiarentzat: pelotak, pala eta paletak, erraketak, xistera eta xareak, zapatilak, arropa, kirol poltsak eta motxilak, osagaiak, garaikurrak eta txapelak... Urria­ren 4an jarri zuen denda on line Barrenetxeak. Mar­txoan berriz, euskarri fisikoa izango du dendak. Hernaniko Mi­txel Kirolak denda hartuko du eta bertan, pelotak ga­rran­tzi berezia izango du. Bitartean, Kardaberaz kaleko lokalean ikusi, probatu eta erosi daitezke aipatutako produktu horiek guztiak.

Eskaria Euskal Herritik, estatutik nahiz kanpotik

Barrenetxeak azaldutakoaren arabera, pelotadenda.com mar­txan jarri zuenean, eskaria Eus­kal Herritik, hegoalde nahiz iparraldetik, Errioxa­tik, Burgosetik, Madriletik, Bar­tze­­lo­natik edo Valentzia­tik izango zela pentsatzen zuen. «Hau da, berez pelota joka­tzen den le­kue­tatik». Eta eskema guztiak hautsita, lehenengo eskaria Galiziako O Po­rri­ño herritik etorri zi­tzaion. «Frontoirik ere ez zuten bertan, baina ondoko herri batera joaten dira joka­tzera eta esku pelotak lortzeko zailtasunak zituztela esan zidan bezeroak. Eta ez pelotak bakarrik, tako bezala, aulkien azpian jar­tzen diren pegatinak erabil­tzen omen zituzten!», dio Ba­rrenetxeak. Galiziatik ez ezik, Mala­ga­tik ere pelotaren bat eskatu dio­te, Argentinatik... «Ez du mu­­­­garik. Konturatu naiz euskal pelota oso zabaldua dagoela eta espero baino hu­tsune gehia­go dagoela materiala es­ku­ratzeko». Askok eskerrak eman dizkiela ere azaldu du, «bazela garaia halako zerbait jartzeko».

Helburu komertziala baino gehiago

Barrenetxeak azpimarratu due­nez, proiektuaren helburua ez da pelota arlo komer­tzia­letik bakarrik lantzea, euskal pe­lota bera ezagutzera emateko bidea ere izan nahi du. Izan ere, pelotari buruz asko dagoela ikasteko dio Ba­rrenetxeak. «Esa­te­ra­ko, eus­kal pelota ez da esku pelota ba­karrik. Moda­li­ta­te asko dau­de, hala nola, pa­le­ta goma, joko garbi, zesta pun­ta, laxoa, errebotea... Eta ez da Euskal Herrian edo esta­tu­an bakarrik jokatzen. Es­ta­tu mai­latik kan­po, Frantzian, He­go Amerike­tan, Mexikon, AEBe­­tan, Filipi­netan, Ku­ban, Txi­nan... joka­tzen da pelotan». Horrez gain, argi utzi du, pelota ez dela mu­tilen kirola bakarrik, leku askotan hala uste arren. «Ema­kume askok joka­tzen dute egun, Hernani adibideetako bat da, eta orain dela 60 urte eta gehiago ere joka­tzen zuten Madrilen esaterako, ra­ke­tista moduan». Pelotari buruzko informazioa zabaltzeko asmoz, pelotadenda.com-en pelotarekin zerikusia duten loturak ikusi daitezke: pelotari buruzko notiziak, arauei buruzko informazioa, elkarteekin linkak... Eta informatzeaz gain, saritu ere egiten ditu bezeroak. Hi­lero zozketa bat egiten du eskaria egin dutenen artean. Den­da­ko detaileren bat izaten da opa­ri. Hilabete honetan, pala era­mateko poltsa banatuko du.