Hernaniko Kronikak hamar urte bete zituen ekainaren 23an, eta urte osoan zehar hainbat ekitaldi ari da egiten hernaniar guztiekin ospatzeko asmotan.
Biharkoan Hernaniko hiru abesbatzen kontzertua antolatu du, Milagrosan. Kantuz, Ozenki eta Goiz Eguzkiko abesbatzen emanaldia izango da, berezitasun batekin. Ozenki eta Kantuz abesbatzako kideek elkarrekin, ACT arraun himnoa abestuko dute, Imanol Kamio ereñotzuarrak egina. Abesbatzen emanaldia arratsaldeko 20:00etan izango da.
Urte osoan zehar,
ospakizunak
Ospakizunekin martxoan hasi zen, Larre-Gain sagardotegian antolatutako afariarekin. Ehundik gora lagun bildu ziren, elkarrekin afaldu, eta ondorengo bertso saioaz eta Esne Beltzaren kontzertuaz gozatzeko.
Urteurreneko jai nagusia ekainean egin zen: egun guztiko festa. Goizean Mendiriz Mendi elkartearekin mendi buelta egin zuten mendia gustoko duten herritarrek. Ondoren, Hernaniko pelotarien arteko pelota partiduak jokatu ziren Tilosetan. Eta umeek ere izan zuten bere txokoa, bai goizez, eta baita arratsaldez ere: goizean joko eta tailerretan ibili ziren, eta arratsaldean, Gazte Txokoak antolatutako ekintzetan hartu zuten parte. Ondoren, kontzertuak izan ziren, Tilosetan baita ere; Oi dek oi! taldea, Ania bakarlaria eta Laiotz taldea arduratu ziren festari amaiera borobila emateaz.