Abiadura Haundiko Trenaren aurkako taldea sortu nahi dute Hernanin, eta horren berri emateko Herri Batzarra egingo dute gaur, arratsaldeko 19:30etan, Biteri kultur etxean. Herri Batzarrera agertzeko deia egin diete herritarrei, AHTren aurkako mugimendu kolektibo eta asanbladaren sorreran parte hartzera.
«Ez Urumean, ez inon... AHTrik ez!»
Antolatzaileek adierazi dutenez, beste munstro batek mehatxatzen du Euskal Herria, AHTk: «egitasmo faraonikoa da, ikaragarri garestia eta ingurugiroari eraso itzela eragiten diona. Orain arte naturaren kontra egindako eraso bortitzena da».
Azaldu dutenez, instituzioek, AHT krisi ekonomikotik irteteko eta Euskal Herria modernizatzeko balizko pieza bezala agertu dute: «baina egungo arazo ekonomiko, sozial eta ekologikoak larriagotu egiten ditu. Horrez gain, salatu nahi dugu instituzioen erabateko sekretismoa eta baita biztanlegoaren gutxieneko informazio eskubidearen zapuzketa ere».