Solasaldiaz gain, musikaz gozatu eta itzultzailearekin hitz egiteko aukera izango da etzi

Literatur solasaldiak egitasmoaren barruan, saio berezia izango da asteartean, EIZIE euskal itzultzaileen elkarteak eta Udal liburutegiak antolatuta. R. Carverren Zertaz ari garen maitasunaz ari garenean liburua izango da hizketagai eta ohiko solasaldiaz gain, musikaz gozatu eta Koro Navarro liburuaren itzultzailearekin hitz egiteko aukera izango da, Udaletxeko Areto Nagusian, 19:30etan. Idoia Noble EIZIEko kidea eta Raquel Gonzalez Liburu­tegiko arduradunaren arabera, solasaldiak beti dira irekiak, hau da, edonork hartu dezake parte baita entzule bezala ere. Baina oraingo honetan, are irekiagoa izango dela diote eta herritar guztiei luzatzen diete gonbitea. «Izan ere, mantenduko da solasaldien ohiko dinamika, baina beste elementu ba­tzuekin hornituta egongo da: musika, itzultzailea bera…».

‘Literatura unibertsala bilduma’ sustatzeko
Literatura unibertsala bilduma izeneko proiektua sustatzeko as­moz jo zuen EIZIE elkarteak Her­naniko liburutegira. Proiek­tuaren 20garren urteurrena de­la eta, sustapen lanetan dabiltza EIZIEko kideak eta Hernanin, lite­raturaren inguruan, dinamika jakin bat bazegoela bazekiten eta egokia iruditu zitzaien halako saio bat bertan probatzea. «Se­ku­la­ko ilusioarekin hartu zu­ten, bai Raquelek eta baita Ane Mayozek ere (dinamizatzailea) eta modu erraz eta arinean hartu du bi­dea», dio Noblek. Gon­zalezi be­rriz, euskerazko solasaldiei bul­tzada bat emateko aukera ezinhobea iruditu zitzaion.

Eredu gisa solasaldietan asko erabili den liburua
Saio berezirako Zertaz ari garen mai­tasunaz ari garenean liburua au­keratu dute eta zergatiaz galdetuta, honakoa erantzun du Gon­zalezek: «Liburu hau Litera­tura unibertsala bildumako aukeretako bat zen eta egokia izan zitekeela pentsatu nuen Anek ipuinak asko lan­tzen dituelako solasaldietan eta horietan askotan erabili duelako liburu hau eredu bezala. Anek ados zegoela esan zidan».

Musika, Joxan Goikoetxearen laguntzarekin
Musika aukeratzerako orduan, Musika Eskolara jo zuten eta bertan, Joxan Goikoe­txea zuzendariak lagundu zien. Mireia Otze­rinjauregik eta Sor­kun­de Idigo­ra­sek girotuko dute saioa. yy