Hernanitik bidegorritik abiatu, eta Gipuzkoako herri nagusienetara iristeko aukera izango da, 15 urte baino lehen. Donostiara joateko hiru aukera izango dira: bat, Errekaldetik; bestea Aietetik; eta hirugarrena Astigarraga-Loiolatik. Urnietatik barrena aukera izango da Andoain, Tolosa eta Goierriraino joateko; Astigarratik baita ere, Oiartzunera, Errenteriara, edo Irunera; Aranoko mugaraino ere bidegorria egitea proposatu du Eusko Jaurlaritzak Donostialdeako Lurraldearen Zatiko Planean. Garraio publikoari buruz ere proposamen batzuk egiten ditu Eusko Jaurlaritzak, plan horretan; besteak beste, txartel bakarra erabiltzea, trena eta autobuserako. Eusko Jaurlaritzak urrian aurkeztu zuen Donostialdeako Lurraldearen Zatiko Plana, eta bertan erakusten du, 2025 urtera arte egingo diren obrarik nagusienak, Donostialdeako lurraldean. 13 herri biltzen ditu plan horrek: hasi Usurbil eta Andoainen, eta Iruneraino. 376 km2-ko lur-eremua; 400.000 biztanle hartzen dituena. Erakusketan dago Plan hori, azken erabakia emateko zain, Donostiako Aquariumean, azaroaren 20ra arte.
Gipuzkoa, bidegorriz lotua
Datozen 15 urteetan, posible izango da Hernanitik bidegorrian sartu eta Mutrikuraino joatea. Mutriku adibide bat da; izan liteke, Irun; edo Zaldibia. Bederatzi bidegorri nagusi egiten hasiak dira horretarako (ikusi ondoko koadroa). Ondoko probintzietara ere bidegorrian joateko modua izango da: Bizkaira, Mutrikutik edo Eibartik; Arabara, Leintz-Gatzagatik; Nafarroara, Leitzarandik (edo, onartzen bada, Hernanitik); Lapurdira, Behobiatik.
Guztira, 424 km dira, eta dagoeneko eginak, 150 km inguru. Asko dago, beraz, egiteko; egia da, ordea, azken urteetan asko ari direla azkartzen lanak.
Bi bidegorri nagusi,
Hernani ondotik
Hernani ondotik bi bide nagusi pasako dira: bat, Goierritik datorrena, Urnietan barrena, eta Donostiaraino doana, Astigarraga-Loiolatik. Bestea, Mutrikutik Donostiara doana (Zarautz, Orio, Usurbil), eta Errekaldetik pasatzen dena, Añorgan barrena Antiguoraino.
Hernanik aukera izango du bi bide nagusi horietara iristeko, Eusko Jaurlaritzako Lurraldearen Planean dioenez; eta hirugarren aukera bat ere izango da, Donostiara joan nahi duenarentzat: Aietetik barrena joatea. Galarretara bidegorria iritsiko da Hernaniko kaxkotik, Cuesta de la Muertetik barrena. Galarretan bi aukera izango dira: Errekaldera joatea (Chillida-Lekun barrena), edo Aietera joatea (Estubegiko aldapan barrena, Young Play).
Oiartzun ere esku-eskura izango da (Astigarraga-Perurena...), eta beraz, baita Errenteria, Irun, eta Hendaia ere.
Eusko Jaurlaritzak dioenez, Aranoko mugaraino iritsi liteke bidegorria, 2025 urtea baino lehen. Horretarako, Ereñotzutik gora kilometro askoan egin beharko litzateke, bidegorria. Nondik eta nola, ez dute zehaztu.
Lehentasuna, oinezkoek
Bide horietan, lehentasuna oinezkoek izango dute. Oinezkoek eta gero, bizikletek. Gertatzen da, kasu batzuetan, kotxeak bide horretan sartu beharra; kasu horretan, oinezkoek eta bizikletek izango dute lehentasuna.
Eusko Jaurlaritzak dioenez, bidegorri horiek ahalik eta leku erosoenetan egin behar dira (lehentasunez, ibai-ertzetan edo leku ordeka xamarretan). Errepideak egiteari eman izan zaion garrantzia eman beharko zaio, hemendik aurrera, bidegorri horiek egiteari.
Joan den astean akordio baten berri eman zuten Gipuzkoako Diputazioak eta Eusko Jaurlaritzak. Horren arabera, datorren urtean txartel bakarra erabili ahal izango da Lurraldebus, Renfe eta Eusko Tren erabiltzeko. Tarifak berdindu egingo dira hiru garraiobide horietan, eta deskontuak eta bonifikazioak ere berdin aplikatuko zaizkie hala dagokien kolektiboei.
Horren arabera, berdin ordainduko da Beasainera trenez edo autobusez joatea. Eta gainera, transbordoak dohainik egingo dira.
Autobusari dagokionez, Hernanik linea gehiago izango ditu epe motzean. Usurbilera zuzenean joateko autobusa izango du laster, eta autobus gorri eta urdinak auzo gehiagotara
iritsiko dira.