Udal Berdintasun Sailak antolatuta, aurtengo Emakumeentzako Jabetze Eskola martxan da urritik, eta datorren ikastaroa, datorren asteburuan izango da. Sexualitateari buruzko ikastaroa izango da. Kotte Susperregi irakasleak helburu izango du, aukera zabaltzea emakumeei, sexualitatea ahalik eta hoberen bizitzeko. Jaiotzez, naturaltasuna, jakinmina eta plazerra bilatzea nagusitzen badira ere, nerabezarotik aurrera, jendearen moral sexualagatik, norberak bere mugei, lotsei, beldurrei, eta abarri aurre egin behar izaten diela azaldu eta gai horietan sakonduko du. Horrez gain, sozialki transmititzen den eredu genital eta falokratikoak, zakilaren boterean oinarritutakoa alegia, gizonengan eta emakumeengan duen eragin ezberdinaz ariko da.
2 egunetan azalduz gero,
12 euro soilik
Ikastaroa 12 ordukoa izango da. Larunbatean 16:00etatik 20:00etara; eta igandean 10:00etatik 14:00etara eta 16:00etatik 20:00etara. Prezioari dagokionez, matrikula egiteak 42 euroko kostua du, baina %80ko asistentzia duten ikasleei 30 euro itzuliko zaizkie.
Izena emateko, Udal Berdintasun Sailetik pasa behar da (Sandiusterri, 1), 943 33 70 17/ 943 33 68 02 telefonoetara deitu, edo irantzu-j@hernani.net helbidera idatzi. Epea asteazkenean bukatuko da.
Drag-King tailerra, abenduan
Hurrengo ikastaroa abenduaren 3an izango da, Drag-King izeneko tailerra. Tailer horretan emakumeek maskulinitatearekin jolastuko dute. Gizon izatea antzerki bat dela ikusaraziko zaie.