Errekor berria jarri du munduan, Hernaniko Roke Haragiak enpresak. Pastilla izeneko behiarekin lortu du Guinness errekorren liburuan sartzea. Atzo hil zuten Pastilla Zestoako Urkaiko hiltegian eta kanalean 892kg pisatu zituen, orain arteko errekorra zuen behiak baino 21kg gehiago. Bizirik 1.390kg pisatzen zituen.
Ohi baino azal finagoa
Roke Haragiak-etik azaldu dutenez, horrelako behiek izan ohi dutena baino azal finagoa zuen; 69kg soilik pisatzen zituen. Lortutako haragia berriz, koipetsua eta kalitate onekoa dela azpimarratu dute. Txuleta bakoitzak 2,5kg pisatuko dituela kalkulatzen dute. Txuleta horiek Urnietako Elutxeta sagardotegian izango dira jateko aukeran, azaroaren 20tik aurrera. Xerrak, berriz, Donostiako Roke Uxala harategian.