Hamaikabat alderdiak prentsa oharra bidali du Hernaniko Kronikara eta bertan, Iñaki Arratibel alderdiko bozeramaileak dio eskandalizatzeko modukoa dela Garbitania Zero Zabor enpresa publikoaren inguruko argitasun falta. «Enpresa sortu da hondakinen gestioaren kontrola oztopatzeko, ez dute testigurik nahi beraien saltsatan». Eta jakinarazi du enpresari buruzko informazioa eskatu duela Zerbitzu Publikoetako Batzordean. Honako informazioa eskatu du: enpresan Hernaniko Udala ordezkatuko duten kontseilarien izendapena, enpresa horrek kontratatuko dituen langileak, Hernaniko hondakinen gestioa noiz hartuko duen beregain eta zerbitzu horiek nola fakturatuko dituen.
«Erabakien berri eman behar dute»
Prentsa oharrean Arratibelek azaltzen duenez, Merkataritza Erregistroko Aldizkari Ofizialean ekainaren 4an argitaratu zen, Administrazio Kontseiluko idazkaria Marian Beitialarrangoitia alkatea dela, eta kontseilariak Izaskun Txintxurreta eta Beatriz Fernandino zinegotziak. Eta beharrezkoa ikusten du hartzen ari diren erabakien berri ematea: «Hartzen dituzten erabakien berri eman behar dute eta Udalean azaldu behar dute egiten ari diren kontratazioak zeintzuk diren eta Udala nola fakturatuko duten». Eta gaineratu du kontrolik gabeko enpresa izango dela eta atzetik ibili beharrean daudela.