Amiantoari buruz hitz egiten duen La Plaza de la Música. Historias del amianto dokumentala jarriko dute gaur arratsaldean Biteri kultur etxean, 19:00etan. Juanmi Gutierrezek egindako dokumentala Donostiako Zinemaldian aurkeztu zuten. Iritzi ugari jasotzen dira bertan, horien artean, amiantoak kaltetutako jendearenak, sindikalistenak, adituenak, eta erakundeetako ordezkarienak.
Dokumentala ikusi eta gero, CCOO sindikatuko arduraduna den Jesus Uzkudunek hitzaldia emango du.
Adierazi dutenez, Hernanin amiantoarekin lanean aritu diren herritar ugari daude, enpresa eta siderurgietan lan egindakoak, eta bereziki horiei zuzenduta dago gaurko emanaldia; Uzkudunek azaldutakoaren arabera, Hernanin 200-300 pertsona inguru egon litezke arriskuan. Helburua da amiantoak zein kalte eragiten dituen jakitea, eta kaltetuek jakitea kalte ordainak eskatu ditzaketela.
Kasu erreal bat kontatzen da dokumentalean
Gutierrez zuzendariak bere amaren kasua kontatzen du dokumentalean, ama hil ondoren jakin baitzuten amiantoak eragindako gaitz baten ondorioz hil zela. Gutierrezen amak ez zuen amiantoarekin lan egin, baina Errenteriako Paisa enpresaren ondoan bizi ziren, eta enpresak barruko hautsak bentiladoreetatik botatzen zituen airera. Hortaz, dokumentalean ez dute soilik amiantoak langileei eragin dizkien kalteak salatu nahi, baita ingurumenari egindakoak ere.
Horrez gain, azaldu dute amiantoaren auziak bidea ematen duela beste gauza batzuk ikertzeko, luzarora arazo bera sor ditzakeen beste material batzuk ere existitzen direlako.