incansables txaranga zeinek ez du ezagutzen? Taldearen izena eta taldearen izana, doinuak, kantuak, ezagunak dira Hernanin, Gipuzkoan, eta baita askoz urrutirago ere.
1970ean sortu zuten Incansables txaranga bost lagunek, tartean 2 hernaniarrek, eta gero ere hernaniar gehiago izan dira taldean. Berrogehi urtean taldeari indartsu eusteak merezi du horrenbeste, eta gaur ospatu egingo dute, urte horietan taldekide izan direnak bilduta. Taldekideetako bat, ordea, ez dute beren artean izango. Felipe Sagarna Zapa 1980ko apirilaren 19an hil zuen Batallón Vasco Españolek. Horregatik, gaur, urteurren egunean, euren taldekideari omenaldia eta lore eskaintza egingo dizkiote Hernaniko Kaxkoan, Zaparen etxe aurrean. 13:00ean egingo diote lore eskaintza Zapari. Zita lehenxeago egin dute Plazan, eta beraz, ez da musika faltarik izango Hernaniko kaleetan, bazkal-ordura bitarte, nekatu, ez baita inoiz egiten talde hau!
Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!