HERNANIAR askok egingo du bisita hilerrira, hildako familiako eta lagunei bisita egitera. Batez ere, gaur eta bihar espero da jende gehiena, eta dagoeneko inguratu direnak ere badira. Lore dendatan mugimendua nabaritu da urtero bezala, gehienak lore-eskaintza eginez joaten baitira hilerrira: krabelinak, margaritak, loriumak eta gladioloak dira batez ere jendeak erosten dituen loreak.
Hilerria txukun,
urte guztian
Hernaniko hilerria prest da Santu Guztien Egunerako. Urte guztian mantentze lanak egiten direla azaldu digu Josu Apezetxea enterratzaileak, eta garai honetan mugimendua dagoeneko sumatu dela. «Asko inguratu dira beren familiako panteoiak garbitu eta txukuntzera, egun honetarako». Panteoiak pribatuak dira, eta familiari dagokio mantentze lana. Gainerakoa Udalak garbitzen du, urte guztian. Apezetxeak zortzi hilabete daramazki lurperatzaile lanetan, eta denetik egin behar izaten duela adierazi dio Kronikari: «lurperatzaile lanak egiteaz gain, tokatzen zaigu, hainbestean behin, nitxoetatik hezurrak ateratzea ere, gero hosariora sartu edo erre eta abar egiteko; eta baita lorazaintza eta igeltseritza lanak egitea ere». Udaberrian lan asko izan dela adierazi dio Kronikari Apezetxeak. «10 bat lurperatze izan dira hilero, eta horietatik 2-3 erraustu dira». Hernaniko hilerria 1915ean ireki zen, Txantxillakoa itxi zenean. 400 panteoi ditu eta 920 nitxo. Panteoiak familiarenak izaten dira batez ere, nahiz eta Udalak batzuk badituen. Nitxoak Udalarenak dira, eta 10 urtetarako ematen zaizkie familiei, alkiler moduan. Hilerria anpliatzeko lanak oraingoz ez dira egingo, beharrik ez dagoelako. Gero eta lurperatze gutxiago izaten direlako hartu da erabaki hori.
Erramun Beltza - Segi Hiru enpresa:
«Egunotan lan asko dugu panteoiak txukuntzen»
segi Hiru enpresak panteoiak txukuntzen egiten du lan, eta mugimendu haundia dabilkite azken asteotan, Santu Guztien Eguna dela eta. Enpresa honek Hernanin hilabete gutxi daramazki, baina ondo lan egiten ari direla adierazi diote Kronikari. «Dagoeneko 6 panteoi garbitu ditugu, eta enkargatu digute besteren bat». Lanik gehiena Donostiko Polloen egiten dutela adierazi dio Kronikari Erramun Beltzak, enpresako arduradunak.
«Erabat berritu»
Segi Hiru enpresak panteoiak «berritu» egiten ditu. Prozesua esplikatu dio Kronikari Erramunek: «Plakak kentzen ditugu lehenengo. Gero ura pasatzen diogu harriari, presioan, eta ofizioko produktu bat eman, garbitu arte. Plakak tailerrean garbitzen dira, eta letrak berritzen zaizkie: pintatu, grabatu eta abar. Argoilak margotu, ingurua garbitu eta juntak jasotzen dira». Mantentze lanak ere egiten ditu Segi-Hiruk, astero-astero, nahi izanez gero.
Gaitz mentala dutenekin lanean, 9 urtez
Segi Hiru enpresan 37 pertsona ari dira lanean. Gaitz mentala duten pertsonei lana ematea da enpresaren helburua, «baldintza ahalik eta duinenetan». Erramunek sortu zuen lantegia, bere semeak gaitz hori zuelako, eta problematika antzekoa zutenentzat erremedio modura. 4-5 orduko jornada dute langileok, eta eskuz egiten dituzte lanak, «oso txukun, eta ordainduta».
Hilerriko lanez gain, beste hainbat lan egiten ditu enpresa honek: zeramikazko ontziak; bateriak, filtroak, sepiolitak desegin, eta abar. Hernanin Portuko erriberan loreak hazteko mintegia jarri dute, eta laster baratza egingo dute, inbernaderoetan.
Harremanetan jartzeko, deitu 943460977 telefonora edo idatzi helbide honetara: segi@segihiru.com.