2011 urteko udaberrian hartuko du indar dekretuak. Egun horretatik aurrera (eta dekretua onartzen bada), 5 kilotik gora ezingo da bildu egunean, Gipuzkoako Parke Naturaletan. Garai berriak datoz perretxiko zaleentzat; orain arte ohizkoa zen perretxiko kolpea zenean, ahal zen guztia bildu eta etxera ekartzea; horrek jende pila haundiak bildu ditu zenbait mendi eta basotan. Arabak eta Nafarroak bezala, Gipuzkoak ere arautzeko bideak hartu ditu, beraz. Orain arteko neurrietan biltzen segita, espezie asko arriskuan egon daitezke. Foru Dekretua urriaren 19an jarri du erakusketan Diputazioak, eta azaroaren 12an kenduko du. Bitartean, alegazioak jartzeko aukera izango da (dekretua ikusteko: www.gipuzkoa.net).
Ale txikirik ez, eta saskietan
Perretxikoa haundituta dagoenean bildu behar dela dio dekretuak, «txapela hedatuta eduki behar dute, eta debekatu egiten da beren garapenaren lehen fasetan dauden perretxikoak biltzea». Saskiak erabiltzeko ere esaten du arauak, edo beste ontziren bat, baina beti, perretxikoen esporak zabaltzeko egokiak direnak.
Landaretza errespetatu
Kontuz ibili beharko da basoko landaretza hondatu gabe. Zorua mugitzea, landareak ipurditik ateratzea, eskuz nahiz erramintaren bat erabiliaz, erabat debekatuta geratuko da. Perretxikoen mizelioak (sustraiak, espeziea bera lur-azpian egoten da), kontuz zaindu beharko dira. Puskatuta edo hondatuta dauden aleak bertan utzi beharko dira, eta biltzen ez diren aleak ezingo dira puskatu, ez badago arrazoi nabarmenik, «identifikazio taxonomikoa behar bezala egiteko aleren bat puskatu behar izatea-edo».
Egun argiz ibili beharko da.
Aiako Harria parkea
Gipuzkoako parke naturalei eragingo die dekretuak. Hernanin, Aiako Harria parkea daukagu, eta Gipuzkoan: Aizkorri, Pagoeta eta Aralar. Baso pribatuetan, baso-jabeak bildu ahal izango du 5 kilotik gora, baina Diputazioan eskaera egin beharko du, hartarakoxe.
Basozainek isunak jarri ahal izango dituzte, 60 eurotik 300.000 euro bitartekoak, arau haustearen arabera. yy