Alkatea «hipokrita» dela dio PSE-EEk, bere soldata mantendu eta funtzionarioena jaistea onartzeagatik

PSE-EE alderdiak Alkatearen hipokresia kritikatu du Kronikara bidalitako prentsa oharrean, funtzionarioen soldatak igotzea onartu, eta berea mantentzeagatik: «Ple­noan Gobernu taldearen aldeko botuekin bakarrik onartu zen Udaleko funtzio­narioen soldata jaistea». Jose Ramon Chica bozeramailea­ren­tzat, gaur egungo egoera ekonomikoaren ondorioz, ahal den esfortzu haundiena egin behar da Udaleko gastuak gutxitzeko: «guztiok izan behar dugu austeritatearen eredu, solidarioak izan behar dugu krisia gehien jasaten ari direnekin». Bozeramaileak dio Errege Lege Dekretuaren (8/2010) arabera, defizit publikoa murrizteko ezohiko neurriak hartu behar dira, eta horren ondorioz aurtengo soldatak murriztu egiten dira, eta 2011koak izoztu. Horrez gain, sol­datarik gabeko zinegotzienak ere jaisten dira: «hau da, oposizioaren gehiengoa edo guztia. Asistentzia dietak bakarrik ko­bratzen dituzte, hau da, beraien diru-sa­rrera bakarra da, eta le­gegintzaldi hasieratik izoztuta dute, azken hiru urtetan ez dute igoerarik izan». Udaleko langileak balira bezala, Al­ka­teak eta Gobernu Taldeak ordea soldata igo dutela azaldu du Chicak, baina jaisteko orduan ez dutela neurri bera erabili: «Alkatea eta bere gobernuak soldata jaitsi diete, baina beraiek berdina kobratzen jarraitzen dute, legegintzaldi hasieran beraiek finkatu zuten soldata bera». Horrez gain, bozeramaileak dio jarrera hau FEMPk eta EUDELek gomendatuta­koa­ren kontra dihoala, eta baita beste erakunde, Gobernu, Diputazio eta Udaletan hartzen ari diren neurrien kontra». Bukatzeko, Chicak adierazi du Alkatea solidaritate eta langileen batasunari buruzko lekzioak ematen ausartzen dela krisi momentu hauetan: «bere jarrerak erakusten du noraino iristen den ideologia, eta noraino poltsikoa, kasu honetan poltsikoak irabazi du».