Plenoak 2011rako ordenantza aldaketa-proposamena onartu zuen herenegun. Hori horrela, onartu da datorren urteko tasak KPI (IPC)aren arabera igotzea. Igoera %2koa izango dela aurreikusten da. Uraren kasuan, berriz, igoera %5,25ekoa izango da, Añarbeko Urak S.A.k ezarria. Bozketa bi zatitan egin zen Hamaikabat alderdiak hala eskatuta. Alde batetik, hondakinen gaineko tasak %2 igotzea bozkatu zen. Gobernu Taldeak eta Ezker Batuak alde bozkatu zuten eta gainerako alderdiek kontra. Bestetik, gainerako arloetan tasak %2 igotzea bozkatu zen. Gobernu Taldeak alde bozkatu zuen, PPk kontra eta PSE-EE, Hamaikabat, PNV-EAJ eta EBa abstenitu egin ziren.
Taxi tarifa %1,9 igo
Taxi zerbitzuaren tarifak 2011n %1,9 igotzea proposatu du AGITAX taxisten elkarteak eta Plenoak aho batez onartu zuen. Orain Euskadiko Prezioen Batzordeak eman behar dio onarpena. Hori horrela, tarifa berriak honakoak lirateke. Egunekoak: abia saria 3,1919 euro, egindako km-ak 0,9963 euro eta itxarondako ordua 19,1191 euro. Gauekoak: abia saria 3,1919 euro, egindako km-ak 1,5963 euro eta itxarondako ordua 30,0473 euro. Gaueko tarifa ezarriko da gaueko 22:00etatik goizeko 07:00etara eta igande eta jaiegunetan goizeko 07:00etatik gaueko 22:00etara.
Kirol Patronatua desegiteko,
beste pauso bat
Aipatutakoaz gain, herenegungo Plenoan onartu ziren baita ere, Arau Subsidiarioetan aldaketa puntuala egitea, Galarretan eta Sorgintxuloko zati batean, horietan aurreikusten diren proiektuak egin ahal izateko.
Horrez gain, Udal Kirol Patronatua Toki Erakunde Autonomo gisa desegiteko beste pauso bat gehiago eman zen. Desegitearen aldeko akordioari otsailaren 23an eman zitzaion hasiera eta herenegun, lehenenego onespena eman zitzaion. Behin betiko onarpena eman aurretik, orain, 30 egunetan, erreklamazioak egiteko aukera izango da.