Abiadura Haundiko Trenaren obrak direla eta, Urnietan eta Hernanin egingo diren espropiazioei buruzko informazio publikoa urriaren 26an ireki zen, Estatuko eta Gipuzkoako Aldizkari Ofizialetan argitaratutakoaren arabera. Informazio hori, baliodun diren 15 egunez egongo da zabalik, hau da azaroaren 16ra arte. Tarte horretan, alegazioak jartzeko aukera izango dute espropiazioa jasango duten jabeek, edota espropiazioa dela eta kaltetutako pertsona eta erakundeek. Espropiazioei buruzko informazioa eskuragarri dago Hernaniko Udalean bertan eta Estatuko Gobernuak Donostiako Pio XII plazan duen eskualdeko ordezkaritzan.
Hernanin 114 sail espropiatuko dira
Hernaniri dagokionez, guztira 114 sail espropiatuko dira, hau da, 365.456 m2. Horietatik 112.278 m2 aldi baterako okupatuko dituzte. 16.215 m2 berriz, zortasun-ezarpeneko lurrak (lurrak jabeenak izaten jarraituko dute, baina esplotatzeko aukerarik gabe).
Espropiatuko diren lur horietatik gehienak, gaur egun fruta-lurrak, basoak (hostozabalak), zelaiak, lur elkorrak eta nekazaritza lurrak dira. Zenbait kasutan, sastrakak, larreak, mahastiak, baso motzak, ibai ertzeko zuhaitzak eta koniferoak (pinua) dira. Eraikinak ere badira tartean, negutegiak, landa-eraikinak, baserri bat, industria guneak, kirol gunea (Arraun elkartea), orubeak eta garaje itxi bat. Azken horietatik gehienak aldi baterako espropiatuko dituzte edo zortasun-ezarpeneko lurrak izango dira, baina Arraun elkartea, esaterako, betiko bota dute. yy