«Garbitaniak nahierara kontratatu nahi ditu langileak»

Hamaikabat alderdiak Her­­­­naniko Kronikara bidalitako prentsa oharrean dio ANV alderdiko Udal Gober­nuak, Ezker Batuarekin batera, ez duela denborarik gal­tzen eta nahierara kontratatu nahi di­tuztela Garbitania Ze­ro Zabor S.L. enpresako langileak. «Atez Atekoaren aldekoak direnek sortutako enpresa publikoa da eta, feudo pribatu bezala, kontrol publikoko mekanismoetatik pasa ez dadin saiatuko dira», dio. Eta gaineratu du Gar­bitaniako gerentea kontratatzeko epaimahaia, ANV eta Ezker Batuako zinegotziek soilik osa­tzen dutela. «Epaimahai horrek agerian uzten du alderdi horiek enpresa publiko ho­rretan antolatu nahi duten txiringitoa zein den. Eta Hamai­kabat ez dago hori onartzeko prest». Aukeraketa moduarekin ere ez dago ados Hamaikabat: «Bi fasetan egingo dute. Lehenen­goan Curriculuma hartuko da kontuan eta gehienez 40 pun­tu lortzeko aukera izango du­te hautagaiek; eta bigarrengoan 60 puntu, elkarrizketa bat medio. Az­ter­keta soil bat egiteko gai ere ez dira izan». Froga hauen berri emanez, Berria eta Garan soilik argitaratu zela iragarkia azaltzen du Hamaikabatek eta hori ere salatu du: «ez da tokiko prentsan argitaratu, agian jen­de gehiegik jakin ez zezan. Udaleko web orrian ere ez da honi buruzko informaziorik eman». Gerente postuaz gain, beste hainbat lanpostu ere badirela azaltzen du Hamaikabatek, baina guztietan apuntatzeko epea bukatu dela. «Iruzur baten aurrean gaude eta aukeraketa prozesu hau, hernaniar guztioi burla egitea da», azpimarratu du.