EKI proiektuak irabazi du Kultur Gune berria egiteko Ideia Lehiaketa. 42 proiektu aurkeztu ziren Lehiaketara, eta sari banaketan, Marian Beitialarrangoitia alkateak eskerrak eman zizkien parte hartzaile guztiei. Proiektu guzti horietatik lau pasa ziren finalera, eta EKI izan zen garailea, epaimahai guztiaren adostasunarekin. Asteleheneko ekitaldian lau proiektu finalistetatik hiru bildu ziren Biterin saria jasotzera, tartean Jose Luis Loinaz, EKI proiektuko irabazlea.
«Mendialdean integratzen den eraikina da»
Sari banaketen ostean, Jose Luis Loinazek EKI proiektuaren nondik norakoa azaldu zien bertaratutakoei: «mendian integratzen den eraikina diseinatu dugu, mendiak inguratzen duena. Hasierako eraikin trinkoa bitan banatu dugu, eta kanpoaldetik eskailera bat jarri diogu, bi eraikinen arteko lotura egiten duena. Horrez gain, Karobieta eta Urbieta kalea ere batzen ditu, nahiz eta horretarako igogailua ere erabili ahal izango den. Eskaileraren beste funtzioa bi eraikinak azpitik ere batzea izango da, atari zabal baten bitartez».
Antzokia alde batetik, eta Musika Eskola, Kultur Etxea eta Arte Eszenikoetarako gelak bestetik
EKI proiektua osatzen duten bi erakinek funtzio ezberdinak izango dituzte.
Urbieta kaletik hurbilen dagoen eraikineko behe solairuan Arte Eszenikoetarako gelak eta bestelakoak izango dira. Lehenengo solairuan Kultur etxea, eta bigarren solairuan Musika Eskola.
Karobieta ondoko eraikinean Antzokia egongo da, 360 ikusleentzako lekua izango duena. Antzokia bitan zatitu ahal izango da: alde batean 150 pertsonentzako lekua izango da, eta bestean 210entzako.