LAU Haizetara Gogoan taldeak antolatuta, Oroimen Historikoaren aldeko eguna da gaur Hernanin. Frankismo garaiko eta geroagoko gertaerak gogoratu eta ikertu egin behar direla diote taldekideek eta Euskal Herri osoan ari dira horren alde lanean. Gogoratu dute, besteak beste, gaur 74 urte, urriaren 17an, Aitzol eta beste asko fusilatu zituztela Hernanin. Proiektu zabala da, eta gaur hori guztia gogoratuko dute, goizean zehar.
Lehenengo ekitaldia, 11:30etan hilerrian
Aurreneko ekitaldia kanposantuan izango da, 11:30etan; bertan omenaldia egingo dute, eta hitz batzuk egin ostean, lore eskaintza egingo dute. Ordu berean, 11:30etatik 12:00etara Andoaingo errepublikar banda eta koroa ibiliko da herriko kaleetan barrena. Ekitaldi nagusia, eguneko azkena, Plazan izango da, 12:00etatik 12:30etara: garai hartako ikurren erakustaldia egingo dute, Andoaingo errepublikar bandak emanaldia emango du, eta hiru hizlariren hitzak ere izango dira: Izarren Argia pelikulako aktorea, Antxon Gomez, eta Hernaniko errepresaliatuen familiartekoen ordezkariarenak. yy