Osteguneko Plenoak hala erabakita, Hernaniko udaletxeko soldatak murriztu egingo dira, defizit publikoa gutxitzeko. Neurria Errege Lege Dekretutik dator, eta Gobernu Taldearen aldeko botuekin onartu zen. Bi bozketa egin ziren, aurrenekoan, Gobernu Taldeko zinegotzi guztiek alde bozkatu zuten, batek izan ezik; EAJ-PNV, Hamaikabat, PP eta EBak aurka bozkatu zuten, eta PSE-EE abstenitu egin zen. Berdinketaren ostean, bigarren bozketa egin zuten, eta Gobernu Taldeko zinegotzi guztien aldeko boturekin onartu zuten; gainerako alderdiek aurreneko bozketako botu bera eman zuten.
Murrizketa pixkanaka egingo da
Murrizketa pixkanaka egingo da: soldata altuenen murrizketak ehuneko altuago batekin hasiko dira: %5eko gutxitzea izango dute. Eta gradualki jaisten joango dira, eta baxuenek %0,41eko murrizketa izango dute. Horretarako, murrizketa jasotzen duen ordainketa taula berria ezarriko da.
Murrizketa aplikatuko zaie Hernaniko Udaleko eta bere menpeko erakunde autonomoetako funtzionario zein langileei. Dekretuak proposatzen diren neurrien artean, bi, ondorengoak dira:
Bat, 2010 urtean, langileen prestakuntzarako partida 19.720 eurotik erdira jaistea, hau da, 9.860 eurotara, eta 2011n kopurua mantentzea.
Bestea, 2011rako, langileen ordezkapenetarako poltsaren partidarako 140.000 euro aurreikustea, 2010ean baino 10.000 euro gutxiago.
Alkatea: «botoak baietz dio, baina ezezkoa garbi utzi nahi dut»
Plenoko bozketa egin ostean, Marian Beitialarrangoitia alkateak adierazi zuen Alkatetzan dagoenetik bere uste eta gogoaren kontra hartu behar izan duen erabaki bakarrenetakoa izan dela: «hartu dudan erabaki zailenetakoa izan da, eta horixe bera salatu nahi nuke ezer baino lehen, eta argi adierazi ez natorrela bat dekretu honekin. Madrilen erabaki dute zein defizit egoera dugun, eta horri nola aurre egin behar diogun, erabakia inposatu egin digute, Euskal Herrian burujabetza politiko ezaren ondorioz».
Azaldu zuen lehentasuna eta norabidea Madriletik ezarri nahi dietela, orduan eta ageriago utziz euskal esparru sozio-ekonomikoa eraikitzeko premia dagoela: «Udal errealitateak ezagutu eta berezi gabe, Udal autonomiaren kontra egiten duen erabakia da Madrilgoa, nire ordez erabaki eta zer bozkatu behar dudan agintzen duen erabakia. Negoziaketa kolektiboa ere hankaz gora jartzen du, eta langileen bizkarrera botatzen du krisialdiari aurre egiteko ardura. Bestelako neurriak posible badira ere, beti ahulenaren bizkarra jotzen dute. Horregatik guztiagatik, botoak baietz dion arren, ezezkoa garbi utzi nahi dut».
Hernaniren egoera kontuan hartuta, soldatetan eragina duen dekretu hau ez dela onargarria adierazi zuen Alkateak; denentzat egoera bera ezarri nahi horretan, bakoitzak hartutako neurriak ez direla kontuan hartzen jakinarazi zuen: «Hernanin lege agintaldi hasieratik hartu ditugu neurri zehatzak, gure egoera ekonomikoa moldatzeko, momentuan momentuaren araberakoak; eta diru publikoaren erabilpen zuzenak aginduta. Horrek ahalbidetu du azken urte amaierak positiboak izatea, nahiz eta bidean langileei adostutako hobekuntzak aplikatu. Bestelakoak izan dira aurrezte bideak».
Adierazpenetan, gogorarazi zuen Gobernu Taldeak agintaldi hasieran hartu zuela aurreneko neurria, besteak beste, Alkatea beraren eta zinegotzien soladatak jaitsiz: «nire soldata, zehazki, %40 jaitsi genuen, eta honi esker, Udalak lau urtetan 80.000 euro aurreztu ahal izango du. Zinegotzi liberatu eta aholkularien gastua ere murrizten joan da urtetik urtera: 2006an 400.000 eurotik gora zena, 2009an 324.000 izan dira, eta aurten aholkulari bat gutxiago dugu. Asistentzia dietak ere ez dira igo aurten. Horrez gain, aurtengo aurrekontuan pertsonal gastua, langilerian gastatzen duguna eta gastu arrunta jaitsi dugu, 130.000 eurotik gora, guztira». Hori guztia azalduta, esan zuen Udala ari dela bestelako neurriak hartzen egoerari aurre egiteko, eta horregatik argi utzi zuen ez datorrela bat Dekretuak agintzen dionarekin.
Botua eman aurretik, gainerako alderdiek ere arrazoitu zuten beren erabakia
PSE-EE alderdia abstenitu egin zen, eta besteak beste, adierazi zuten, EUDELek (Euskadiko Udal Elkarteak) dion gutxi hori jaitsi beharko litzateke, soldatak lehendik ere jaitsita baitaude.
EAJ-PNVko bozeramaileak azaldu zuen proposamena beste kasuekin alderatu ahal izateko, azken kopurua edo zenbatekoa faltan botatzen zuela, eta nahiz eta eskatu, ez zuela eskuratu; hortaz, aurka bozkatzen zuela.
Hamaikabatek jakinarazi zuen, ezetz bozkatuko zuela, eta egia zela Alkateak beste maila bateko soldata zuela, baina kasu honetan ere, beste langileek bezala, murriztu egin beharko lukeela.
Azkenik, PPko bozeramaileak esan zuen bere ezezkoa ez zela sindikatuek eraginda izan, Alderdiak hartutako erabakia zela.