Begia zorroztu, eta usoaren zain... Hernaniko 119 ehiza-postutan

Miloika uso pasako dira datozen egunetan, migrazioan, Europa iparraldetik, Eu­ropa hegoaldera eta Afri­ka aldera, leku goxoagoen bila, negua pasatzera. Zain, milaka ehiztari dituzte, beste hainbeste ehiza postuetan jarriak. Hernanin 119 postu daude, hiru linea edo mendi-hegitan banatuta: Arizmen­di-Altzea, Larre-Gain, eta Azketa. Beda osoa gaur ireki da, eta urtarrila bukaera arte egongo da zabalik. Usoa da zaletu gehien dituen ehiza, baina asko dira oilagorra, basurdea eta bestelako piezen bila aterako direnak ere.
   
Urte hobearen esperantzan
Joan den urtean 116 uso bota ziren, 15 tortola, 920 birigarro eta beste 50 hegazti, Her­na­niko postuetan. Ez dira oso datu onak ehiztarientzat, beste urte batzuekin alderatuta, behintzat. «Usoa lehen baino gehiago dela diote» adierazi dio Txantxangorri­ko arduradunak Kronikari, «baina zerbaitegatik, beste nonbaitetik ari da pasatzen». Iaz, kosta aldetik asko pasa zela dio Gipuzkoako Ehiza Federazioak.
Orokorrean, Gipuzkoako ehiztari guztientzat izan zen urte txarra iazkoa, eta ez ziren hobeak izan aurreko biak ere. Ehizarako afizioak ez du  behera egin, hala ere.

190 federatu Txantxangorrin
Ez da erreza jakiten, Her­nanin zenbat ehiztari dauden, baina Txantxangorrik dioenez, 200­dik gora behintzat, behar du­te. Txantxangorrik, 190 ehi­za-fe­de­ratu ditu, eta Gi­puz­koa­ko Fe­derazioan zuzenean fe­de­ratutakoak ere ba­tzuk badira, beraz, 200dik gora izango dira Hernanin, ehiztariak. Gipuz­koan, 12.000 ehiztari dira.
Txantxangorrik, horrez gain, baditu arrantza eta tiroko federatuak; arran­tza federatuak 45 bat eta tiroan 35 bat. Denera, 270 federatu ditu beraz, Txantxan­go­rrik.

119 postu, hiru lineatan
Gipuzkoan 4.000 ehiza postu daude, 90 bat lineatan. Postu horiek ehiza elkarteek zozketatzen dituzte, eta Her­na­nin Txantxangorrik egiten du lan hori. Arraltsaldero, 20:00­etan hasten dira sorteoak, eta Hernaniko 119 postuak zozketatzen dira. Azke­tan dira postu gehiena: 50. Larre-Gainen 38 dira; eta Arizmendi eta Altzean 31.
Iaz, zozketetan 4.557 es­kae­ra egin zituzten ehiztariek, eta 4.121 postu adjudikatu ziren. Ehiza gehien Azketan egin zen: 46 uso eta 400 birigarro. Larre-Gainen 55 uso eta 340 birigarro; eta Ariz­men­di-Altzean 15 uso, 180 birigarro eta 15 tortola. 

Oilagor ehiza, gero eta kontrolatuago

OILAGOR ehiztariek aurten par­te guztien berri eman beharko diote Gipuzkoako Federa­zioari, eta hark, era berean, Europako erakundeei jakinaraziko die zen­bat oilagor ehizatu diren Gipuz­koan. Sistema zorrotza jarri die horretarako federazioak ehiztariei. Ehiztari bakoitzak txartel bat izango du, ehiztariaren da­tuekin. Ehizera ateratzen den ba­koi­tzean apuntatu egin be­ha­rko du eguna eta non ibili den. Oila­go­rra botaz gero, txartelari ‘pegatina’ moduko bat kenduko dio, eta oilagorraren hankean jarriko du. Txartel bakoitzak 15 ‘pegatina’ edo prezinto ditu, ehiztariaren NAren (DNI) numeroarekin. Haiek bukatzean, alegia, 15 oilagor botatzean, ehiztariak entregatu egin beharko du txartela, eta beste bat eskatu, hala nahi badu. Ehiztariak ez du dirurik ordainduko, ez bada, Gipuz­koa­ko erregimen bereziko mendi ba­tean ehiza egin nahi duela, ale­gia: Aiako Harria-Jaizkibel, Ara­lar, Arno Izarraitz, Aratz-Aiz­korri-Antzuola, Ernio-Gazume. Kasu horietan, 5 euro ordainduko du txartela, lehenengo aldian.